KAPIT : I

1. <Paulus>: hidünan Yesusa Kristus; paostolan vokedöl, fa God pevälöl ad notükön gospuli Goda, –

2. gospuli, keli epromom büo dub profetans okik in penäds saludik omsik,

3. dö Son okik, kel edavedom mido se posbinükäbef ela <David>;

4. dö utan, kel pejonom lanöfo nämiko as Son Goda dub salud lelifikama se deadans, sevabo Yesus: Kristus, Söl obsik,

5. fa kel edagetobs benädi e paostoli, ad blinön netes valik lobedi lekreda stimü nem omik;

6. lü kels i ols, fa Yesus: Kristus pevälöls, dutols, -

7. valanes fa God palöföles in <Roma>, saludanes vokedöl: Benäd e püd binonsös lü ols de God: Fat obsik, e Söl: Yesus Kristus!

8. Bü val danob Godi obik medamü Yesus: Kristus, demü ols valik, das lekred olsik panunon in vol lölik.

9. God, keli dünob in lanöf obik ma gospul Sona omik, binom temunan oba, vio betikob nenropo olis,

10. ed ai elebegob in pleks obik, das ma vil Goda oplöpobös seimna ad kömön lü ols!

11. Desirob vemo ad logön olis ad blinön tökio oles givoti lanöfik ad nämükön olis,

12. sevabo, das i ob pakuradükobös zänodü ols dub lekred odsik; lekred olsik ed obik!

13. No vilob, das nesevols, o svists! das suvo ediseinob ad golön lü ols, (ab peneletob jünu ad dunön atosi), dat labobös fruti seimik bevü ols, e leigo i bevü nets votik!

14. Labob bligis kol Helänans e no-Helänans, kol sapans e no-sapans.

15. Sekü atos senälob dranäli ad notükön i oles in <Roma> gospuli.

16. Ibä no jemob demü gospul: ibä binon ga nämäd Goda ad savön lekredanis valik: balido yudanis, täno Helänanis.

17. Ibä dub on gid Goda padasevädükon, dub lekred lü lekred, äsä pepenos: <Ritan odakipon dub lekred lifi».

18. Ibä zun Goda onotikon se sül dö nenlekred e negid valiks menas, kels klänedons dub negid verati.

19. Bi utos, kelosi sötoy sevön dö God, binon sevädik pö ons; ibä God edasevädükom atosi ones.

20. Ibä dins nelogädik oma, e näm laidüpik omik, e Godäl omik padasevons dub täläkt; de jaf levala jü jaf binädas; klu ons no binons säkusadoviks.

21. Ibä, do sevons Godi, no eglorükons ed edanons omi asä Godi, ab evedons fopiks dub vätäls oksik; ladäl nensapik onsik edölikom;

22. lecedölo, das binons sapiks, evedons fopiks,

23. ed ecänidons glori Goda laidüpik ko bos, kel sümon ad men deadöfik, böd, follögaf u kripanim.

24. Sekü atos God elovegivom onis ma desirs ladälas onsik nepuede, dat ömiotons rezipiko koapis oksik;

25. verati Godik eplaädons dub lug, jafäbi estimons ed edünons, plas Godi, kel palelobomös laidüpio! So binosös!

26. Sekü atos God elovegivom onis lefäkes jemodik; ibä voms eplaädofs dunis natik dub nenatiks.

27. Leigoso i mans, kels, äklemölo kosädi natik ko vom, edagetoms ledesiri kol ods: mans nepuedoms ko mans, e getoms ito äsä sötos, bläfodi demü deikam oksik.

28. Bi erefudülons ad kipedön sevi Goda, God elovegivom onis kliene fopik ad dunön dinis negidöfik;

29. bi fulons ga me negid valasotik, me nepued, bap, labiäl, bad; me glöt, sasen, feit, käfod, badöf;

30. binons slänans, mispikans, Godihetans, dädükiälans, rogans, pleidülans, datikans dinas badik, nelobediks kol pals;

31. nensüeniks, nekonfidoviks, nenlöfiks, nerekosiloviks, nenmiseriks.

32. Do sevons cödeti Goda, ma kel, utans, kels dunons dinis somik, binons döbiks ad deadam, no te dunons dinis et, ab lobülons igo utanis, kels dunons onis.

1. Sekü atos, o men! kin binolöv, no binol säkusadovik, if cödetol. Ibä, du cödetol votani, micödol ol it. Ibä ol, kel cödetol, mikondötol leigo tefü dins ot.

2. E sevobs, das cödot Goda drefon veräto utanis, kels so mikondötons.

3. Cedol-li jenöfo, o men! kel cödetol utanis, kels so dunons, du ol it leigo mikondötol, das oskeapol pö cödet Goda?

4. U labol-li fomäli pölik dö bundan guda, sufäda e lunasufäla omikas, dubä no demol, das gud Goda lüälon ad leceinön oli?

5. So kumol dub fümädäl e nepönidiäl ladäla olik ole it zuni pro del zuna e paokalüpa cödetama gidik Goda,

6. kel obläfom alane ma vobods onik.

7. Sio olegivom utanes, kels benodons laidälo, e steifons ad stim e nekorupi, lifi laidüpik;

8. ab utans, kels binons zaniäliks, kels no dunons ma verat, ab dünons negidi, podrefons fa zun, fa lezun.

9. Dränäl e dredäl lü men alik, kel dunon badikosi, balido lü yudan, täno lü Helänan;

10. glor, stim e püd lü alan, kel dunon gudikosi, balido lü yudan, täno lü Helänan.

11. Ibä paletöf no dabinon pö God.

12. Ibä utans so mödiks, kels nen lonem esinons, i nen lonem opäridikons, ed utans so mödiks, kels, lonemi sevöls, esinons, pocödetons ma lonem.

13. Ibä no utan, kel dalilon lonemi binon ritik cedü God, ab utan, kel dunon ma lonem, polecedon ritik.

14. (If pagans, kels no labons lonemi, ga dunons oksao ma lonem, do no labons lonemi, tän binons pro oks it lonem.

15. Alseimans blöfons, das büdüls lonema pepenons in ladäls omsik, du konsien onsik temunon atosi, ed ons in vätäls oksik lobülons u micödons dinis);

16. ün del, kü God ocödom utosi, kelos binon klänik in mens medamü Yesus: Kristus ma gospul obik.

17. Ven nemol oli yudani, konfidol lonemi, e pleidülol demü pladät olik kol God,

18. ven sevol diseini, e ma utos, kelosi elärnol se lonem, gudi e badi;

19. ven cedol, das binol geidan bleinanas, lit pro utans, kels binons in dag,

20. dugälan nentäläktanas, tidan tütäböfanas, bi labol ninälo löloti nola e verata in lonem;

21. ol, kel nu tidol votanes, no tidol-li ole it? ol, kel predol, das no sötoy tifön, no tifol-li?

22. ol, kel refudol dulteri, no dulterol-li? ol, kel naudol magotis lugodas, no beravol-li temi?

23. ol, kel pleidülol demü dalab lonema, no läsükol-li stimi Goda, dubä nefölol lonemi?

24. <Ibä nem Goda paslänon fa ols bevü pagans>, epenoy in bibapenäds.

25. Ga säprepüdam labon fruti, if kondötol ma lonem; ab if binol nefölan lonema, tän säprepüdam olik evedon nenvöladik.

26. If ek, kel labol prepüdi, nu kondötom ma lonem, no polecedom-li üfo säprepüdäb?

27. So utan, kel no pesäprepüdom, ab fölom lonemi, obinom cödal dö ol, kel, do sevol lonis, e pasäprepüdol, binol nefölan lonema.

28. Ibä yudan legik no utan binom, kel binom logoto yudan, u kel esufom säprepüdami,

29. ab utan, kel binom ninälo yudan, kel esufom ladälo, lanöfo, no tonatiko, säprepüdami. Atan labom lobi, no de mens, ab de God.

1. In kis üfo buam binälon-li? u kis frut säprepüdama binon-li?

2. At binon mödik in tefs valik. Ibä bü val, vöds Goda pelükonfidons ones.

3. Ibä kis din binon-li? Ven semans evedons nenlekrediks, nenlekred onas enosükon-li üfo fiedi Goda?

4. Nö! lenö! God blebom veratik, e men alik lugan, soäsä pepenos: <Dat pagidükolös dub vöds olik, e vikodolös in cödäd seimik>!

5. Ven nu negid obsik jonon gidi Goda, kisi täno osagobs-li? God (spikob, äsva tefos meni) no binom-li negidik, if lezunom?

6. Lenö! ibä lio kanomöv-li cödön volanefi?

7. Ven nu veratäl Goda lelogädon sekü lugäl oba, kikodo üfo ob nog palecedob-li sinan?

8. E kikodo no siobsöv-li utosi, kelosi semans slänölo sagons, das tidobs ad dunön badikosi, dat gudikos süikonös se atos! Gideto pamicödons.

9. Kis-li üfo? Buobs-li? No löliko. ibä ya büo ekusadobs e yudanis valik e Helänanis valik, das binons sinans.

10. Äsä pepenos in penäds bibik: <Ritan no dabinon, igo no bal;

11. nek binon täläktik, nek sukon Godi.

12. Valans edeikons e leigo rübons; nek dabinon, kel tugöfon, igo no bal>.

13. <Cav onsik binon sepül pemaifüköl, ko linegs oksik spikons cütiko>. <Vipäravenen binon dis lips onsik>.

14. <Mud onsik fulon me maledits e biedäl>.

15. <Futs onsik binons vifiks ad spilön bludi;

16. distuk e yam dabinons su vegs onsik;

17. e vegami lü püd no sevons>.

18. <Dredi kol God no demons>.

19. Nu sevobs, das alutos, keli lonem büdülon, pasagon utanes, kels binons sumätöfü lonem; dat mud alik paseilükon, e volanef lölik döbon lo God.

20. Sekü atos men nonik binon gidik lo God dub vobods lonema; ibä dub lonem sevoy sinodis.

21. Ab nu ebo gid Goda, keli lonem e profetans temunons, pasevädükon,

22. efe gid Goda dub lekred in Yesus: Kristus lü valans e dö valans, kels lekredons. Ibä dist no dabinon.

23. Valans ga esinons e nelabons glori Goda,

24. du paträitons, nen dün anik okas, gidiko sekü benäd Goda dub libükam fa Kristus: Yesus;

25. omi God eprididom as pönid tä lekred in blud omik, as blöf gida omik, pö pard omik sinodas menädas büik,

26. timü sufäl Goda, as blöf gida omik ün tim at, ad jonön, das binom gidik, e träitom gidiko utani, kel lekredon Yesusi.

27. Kiöpo täno fam binon-li? Peplödükon. Ma mafäd kinik-li? Ma mafäd-li vobodas? Lenö! ab ma mafäd lekreda.

28. Ibä vätälobs, das men binon ritik demü lekred okik, nen vobods ma lonem.

29. God binom-li nu te God yudanas; no binom-li i God paganas? Si! i paganas,

30. bi ga God bal dabinom, kel gidükom e säprepüdäbis demü lekred, e prepüdilabanis demü lekred.

31. Finidobs-li üfo lonemi dub lekred? Lenö! Fümükobs lonemi.

1. Benö! kisi osagobs-li, das <Abraham>: fat obas edagetom ma mid?

2. Ibä if pegidükom dub vobods okik, tän labom bosi, demü kel kanom pleidülön, ab no lo God.

3. Ibä kisi penäds bibik sagons-li? <<Abraham> elekredom Godi, ed atos pekalükon ome as gid>.

4. Nu mesed no pakalükon utane, kel vobon sekü benäd, ab sekü ut, keli deboy one.

5. Ab utane, kel no vobon, ab lekredon utani, kel träitom gidiko nenlekredani, lekred okik pakalükon as gid;

6. leigoäsä i <David> spikom dö beat mena, kele God ekalükom gidi plödü kondöt onik:

7. <Beatiks utans binons, kelas negidöfots pepardons, e kelas sinods petegons;

8. beatik man ut binom, kele Söl no kalükom sinodi»!

9. Beataspikam nu demon-li säprepüdäbi, ud i prepüdilabani-li? Ibä sagobs, das ele <Abraham> lekred pekalükon as gid.

10. Ön mod kinik nu atos pekalükon-li ome: ven pisäprepüdom-li, u ven älabom-li prepüdi? No posä pisäprepüdom, ab ven älabom prepüdi.

11. Egetom mali säprepüdama, asä snili gidama demü lekred. So evedom fat, e lekredanas valik, kels no pesäprepüdoms, e keles i gid pekalükon,

12. e fat säprepüdäbas, sotefä no te pesäprepüdoms, ab i dunoms ma sam fata obsik: <Abraham>, kel älekredom, du nog no pisäprepüdom.

13. Ibä prom ele <Abraham>, u posbinükäbefe oma, das ögerom voli, no sekidon de lonem, ab de gid demü lekred.

14. Ibä if binomsöv gerans sekü lonem, tän lekred binonöv nenvöladik, e prom penosükonöv.

15. Lonem süükon ga zuni; utöpo, kö lonem no dabinon, nefölot i no dabinon.

16. Sekü atos gid sekidon de lekred, dat binonös sekü benäd, e prom binonöv lonöfik pro posbinükäbef lölik, no te pro utans, kels slopons lonemi, ab i pro utans, kels labons lekredi ela <Abraham>!

17. Soäsä pepenos: <Ecälob oli ad fat netas mödik>; bi elekredom Godi, kel lelifükom deadanis, e kel jafom dabinoti se ut, kel no dabinon.

18. Ibä pö dinäds nenspelik elekredom spelo, das övedom fat netas mödik ma prom: <Somödik posbinükäbef olik obinon>.

19. Nen läsükam lekreda, no edemom koapi lifovorik okik, älabom ya bäldoti yelas zao tum, e lifovori vüma ela <Sara>.

20. Ga no edotom tefü prom Goda dub nenlekred, ab güo edagetom nämi dub lekred; egivom Gode stimi,

21. ed äsüadom lölöfiko, das äfägom ad jenöfükön promi.

22. Sekü atos pekalükos ome as gid.

23. Das pepenos, das pekalükos ome as gid; no tefon te omi,

24. ab i obis, keles pokalükos, das lekredobs omi, kel elelifükom Yesusi: Söl obas se deadans,

25. kel demü nefölots obsik pelovegivom, e pelelifükom ad gidükön obis.

1. Bi nu pegidükobs sekü lekred, labobs püdi lo God, medamü Söl obsik: Yesus Kristus,

2. medamü kel dub lekred peletobs lü benäd oma, in kel fümobs, e pleidobs, ön spel ad kompenön in glor Goda.

3. Pleidobs no te dö atos, ab i dö dränäl, bi sevobs, das dränäl vedükon obis sufäliks,

4. e sufäl kodon rafinikami, ed at gevon speli.

5. Spel nu no pasäspetükon, bi löf Goda pesestüron ini ladäls obsik dub Saludalanal obes pelegivöl.

6. Züo ga Kristus edeadom ün tim pötik pro nen-Godikans, ven nog äbinobs fibiks.

7. Töbo ek ga oblümon ad deadön pro gidan; pro gudan ye ek olabon bo kuradi ad deadön.

8. Ab God eblöfom löfi okik pro obs, das Kristus edeadom pro obs, ven nog äbinobs sinans.

9. Kludo, nü pegidükobs dub blud omik, plü posefükobs ta zun.

10. Ven nu obs, du äbinobs neflens, perekosilobs ko God dub dead Sona omik, vio mödikumo obs perekosilöl posefükobs dub lif omik.

11. E no te atos, ab pleidülobs i in God, das edagetobs dub Söl obsik: Yesus Kristus rekosili.

12. Sekü atos, leigoäsä dub men bal sinod ekömon ini volanef, e dub sinod dead, i so dead ekömon ini menef lölik, bi valans esinons.

13. Büä lonem ädabinon, sinod äbinon in vol, ifi sinod no pakalükon, if lonem no dabinon.

14. Ab dead edareigon de <Adam> jü <Moyses>, ed i dö utans, kels no esinons ön mod ot, äsä <Adam>, kel äbinom saman utana, kel ökömon.

15. Ab ko sinod legivot benäda no leigäton; ibä if sekü sinod mena bal valans edeadons, mödo mödikum benäd Goda e legivot benäda dub men bal: Yesus Kristus pegevons bundano lü mödikans et.

16. I legivot benäda no baiädon ko jenöfot, das te balan äsinom; ibä micödet pelonon demü nefölot bal, ab benäd: gidükam pelegivon pos sinods mödik.

17. Ibä ven sekü sinod balana dub om dead edareigon, vio mödikumo utans, kels edagetons benädi e legivoti gidükama odareigons in lif dub balan et: Yesus Kristus.

18. Klu leigoäsä dub sinod bal mens valik pemicödetons, so dub legivot bal benäda, mens valik kanons lifön gido.

19. Ibä leigoäsä sekü nelobed mena bal menamödot pevedükon sinans, so sekü lobed balana menamödot et povedükon gidik.

20. Ab vüo lonem ekömon ad gretükön neföloti, e kö sinod egretikon, uto i benäd evedon nog gretikum;

21. dat, leigoäsä sinod edareigon ed ekodon deadi, i benäd dareigonös dub gidükam ad lif laidüpik medamü Yesus: Kristus, Söl obas!

1. Kisi osagobs-li täno? Olaidälobs-li in sin, dat benäd binonös gretikum?

2. Atos no jenonös! Lio obs, kels edeadobs tefü sin, kanobsöv-li nog lifön in sin?

3. U no sevols-li, das obs valik, kels peblunedobs in Kristus: Yesus, i peblunedobs in dead omik?

4. Dub bluned in dead pekesepülobs äsvo ko om, dat, leigoäsä Kristus pelelifükom se deadam dub glor Fata, i obs kondötobs in lif nulik.

5. Ibä, if evedobs äsvo kompeniks pö deadam omik, tän i obinobs kompeniks pö lelifikam oma.

6. Sevobs ga, das men vönädik in obs pekekrodon ko om, dat koap sinik panosükonös, ed obs no plu slafobsös de sin!

7. Ibä utan, kel edeadon, pegidükon de sinod.

8. If nu edeadobs ko Kristus, tän kredobs, das i olifobs ko om,

9. bi sevobs, das Kristus se deadam elelifiköl, no plu deadom: dead no plu reigon omi.

10. Ibä dubä edeadom, edeadom fifümiko tefü sinod; bi nu lifom, lifom pro God.

11. So i ols lecedolsöd olis it deadikis tefü sin, ab lifikis pro God in Kristus: Yesus!

12. Klu no leadolsöd reigön sini in koap deadöfik olsik, dat no lobedolsös ledesiris ona!

13. No gebidükolsöd limedis olsik asä vafis negidik sinode, ab dünolsöd Godi, asä utans, kels elelifikols se deadam, e gebidükolsöd limedis olsik asä vafis gidik Gode!

14. Ibä sin no oreigon olis, bi no binols sumätöfü lonem, ab sumätöfü benäd.

15. Kisi-li kluo? Osinobs-li üfo, bi no binobs sumätöfü lonem, ab sumätöfü benäd? Vo lenö!

16. No sevols-li, das, if vedükols olis it slafanis eka, ad lobedön oni, binols jenöfo slafans utana, keli lobedols, efe u deadio dub sinods, u dub lobed lü gid?

17. Dani Gode! Fe äbinols büikumo slafans sinodas, ab efölols ladöfo diseinäti lejona.

18. Du elibükols olis de sinods, evedols dünans gida.

19. (Gebob magi menik demü fib midik olas). Ibä leigoäsä egebidükols limedis olsik nepuede e nentütede, ed evedols nentütediks, leigoso ogebidükols limedis olsik nu gide, kel dugon ad saludikam.

20. Ibä ven äbinols slafans sinodas, äbinols liviks de gid.

21. Fluki kinik elabols-li de atos? Flukis, dö kels nu jemols; ibä fin onas äbinon dead.

22. Ab nü evedols liviks ä dünans Goda, labols fluki, kel dugon ad saludikam, e fino ad lif laidüpik.

23. Ibä mesed sinoda binon dead; legivot Godik benäda lif laidüpik in Kristus: Yesus, Söl obsik.

1. No sevols-li, o svists! (spikob ga lü mens, kels nolons lonemi), das lonem reigon meni dü tim, kü lifon?

2. Ibä vom matöl petanätof dub lonem himatane liföl; ven himatan ye edeadom, tän pesätanätof lonemo de himatan okik.

3. Sekü atos panemof jidulteran, if odutof lü man votik dü lif himatana okik; ab if himatan ofik edeadom, tän binof lonemo livik, sodas no binof jidulteran, if odutof lü man votik.

4. Leigoso, o svists obik! edeadols lo lonem dub koap Kristusa, ed odutols lü votan, sevabo lü utan, kel pelelifükom se deadam; dat vedolsös flukiks pro God.

5. Ibä dü tim, das ädünobs midi, lefäks sinik, dub lonem pesüüköls, ävobedons in limeds obsik, sodas äbinobs flukiks pro dead.

6. Ab nu pelivükobs de lonem, binobs deadiks lo ut, kel äbligon obis; sodas nu kultobs ma lanöf nulik, e no ma penäd evönädiköl.

7. Kisi osagobs-li üfo? Lonem binon-li sin? Lenö! Ab no äsevob, kis sin äbinon, äsä dub lonem. Ibä no äsevoböv desiri, if lonem no ibüdülon: <No sötol desirön>!

8. Sin, ägebölo pöti dub büdül piloföli, äsüükon in ob lefäkis valasotik; ibä nen lonem sinod binon nosik.

9. Vönädo, ven lonem no ädabinon, ob äbinob utan, kel älifob; ab, nü büdül ekömon, sin evedon lifik,

10. ed ob edeadob. So büdül, kel ödugon ad lifön, evedükon obi deadiki.

11. Ibä sin, ägebölo pöti dub büdül piloföli, ecüton obi, ed edeidon dub atos obi.

12. So lonem binon ga saludik, e büdül binon saludik, gidik ä gudik.

13. Tän bos gudik evedon-li deidovik pro ob? Lenö! ab sin, e dub atos sin ekleilikon, evedükon obi deadiki dub gud, dat sin vedonös dub büdül sustämo kleilik!

14. Ibä sevobs, das lonem binon lanöfik, ab ob binob midik, e pereifob ini nämäd sina.

15. Ibä no sevob utosi, kelosi dunob: ibä, kelosi no vilob, utosi dunob, ab kelosi hetob, utosi dunob.

16. If nu dunob utosi, kelosi no vilob, tän dasevob, das lonem binon gudik.

17. Nu ob no plu binob utan, kel dunob atosi, ab sin, kel binon in ob.

18. Ibä sevob, das in ob, sevabo in mid, bos gudik no dabinon; sio vil in ob dabinon, ab no dun gudikosa.

19. Ibä no dunob gudikosi, keli vilob, ab dunob badikosi, keli no vilob.

20. If nu dunob utosi, kelosi no vilob, tän ob no plu binob utan, kel dunob osi, ab sin, kel binon in ob.

21. Tuvob kludo lonedi at: du ob vilob dunön gudikosi, badikos davedon.

22. Ibä plidob ninälo lonemi Goda;

23. ab in limeds obik logob dareigi loneda votik, kel komipon ta loned tikäla obik, e kel kipon obi asä fanäbi dub loned sina, kel binon in limeds obik.

24. O ob, men miserabik! Kim olibükom-li obi se koap at, in kel dead binon?

25. Dani Gode! fa Yesus: Kristus, Söl obsik polibükob! Klu ob it kultob sio ko tikäl obik lonemi Goda, ab ko mid oba lonedi sina.

1. Klu nu micödet no plu dabinon pro utans, kels binons in Kristus: Yesus. [pro utans, kels no bitons ma mid, ab ma lanöf].

2. Ibä loned lanöfik lifa in Kristus: Yesus elivükon obi de loned sina e deada.

3. Ibä utosi, kelos änemögon pro lonem, bi at äbinon nefägik ad atos dub mid, God edunom me lesed Sona okik in maged mida sinik, e dubä emicödom sini in mid,

4. dat gidükam lonema pafölonös in obs, kels no bitobs ma mid, ab ma lanöf!

5. Ibä utans, kels lifons ma mid, betikons midikosi, ed utans, kels lifons ma lanöf, lanöfikosi.

6. Ibä utos, kelos pabetikon ma mid dugon lü dead, ed utos, kelos pabetikon ma lanöf, lü lif e püd.

7. Ibä betik midikosa binon neflenam ta God, ibä no fölon loni Goda, i no fägon ad dunön atosi;

8. utans, kels lifons ma mid, no kanons plitön Godi.

9. Ols nu no lifols ma mid, ab ma lanöf, if nemu lan Goda binon in ols. Utan, kel no labon lani Kristusa, no duton lü om.

10. Ab if Kristus binom in ols, tän koap olsik binon deadik sekü sin, e lanöf lifon sekü gid.

11. If ye lanal oma, kel elelifükom Yesusi se deadam, binon in ols; om, kel elelifükom Yesusi se deadam, i olelifükom koapi deadöfik olsik dub lanal, kel binon in ols.

12. Klu, o svists! no labobs mide bligi ad lifön ma mid.

13. Ibä, if lifols ma mid, odeadols; ab if deidols dub lanöf vobis koapa, olifols.

14. Ibä alutans, kels padugons fa lanal Goda, i binons cils Goda.

15. Ibä no egetols lani slafa, kel odugon lü dred, ab lani cilama, kel kodon, das vokobs: <Abba>, o Fat!

16. Lanal it eti temunon, kobü lan obsik, das binobs cils Goda.

17. If nu binobs cils, tän binobs i gerans: gerans Goda, kegerans Kristusa; if nemu sufobs kobü om, ad paglorükön i kobü om.

18. Ibä cedob, das suf in lif at läs völadon tä glor, keli olabobs.

19. Ibä jafäbs stebedons lespetiko dasevädükami cilas Goda.

20. Ibä jafäbs pesumätöfükons nelaide, no libavilo, ab fa utan, kel esumätöfükom onis ate, spelölo,

21. das jafäbs it polibükonsös se slaf päridikama lü lib glora cilas Goda-

22. Ibä sevobs, das jafäb alik jünu keyamon e kesufon.

23. E no te atan, ab i obs, kels edagetobs legivotis balid Lanala, seifobs ninälo, du lespetobs cilami, libükami koapa obsik.

24. Ibä pelibükobs spelo. Nu spel palogöl no binon spel, ibä kikodo ospeloy-li utosi, kelosi ya logoy?

25. If nu spelobs utosi, kelosi no logobs, tän stebedobs osi sufädiko.

26. Leigo i Lanal okeyufon pö fibäls obsik. Ibä no sevobs, kisi mutobs plekön pötöfiko; ab Lanal medon pro obs pö seifs nenvödik;

27. ed utan, kel vestigom ladälis, sevom utosi, kelosi Lanal tikon, ven medon ön mod Godi plitöl pro saludans.

28. Sevobs, das val benikon pö utans, kels löfons Godi, kels pedavälons ma desin omik.

29. Ibä, utanis, kelis esevom büo, edavälom ad vedön sümiks äs mag Sona omik, dat atan binomös balidan blodas mödik!

30. Ed utanis, kelis edavälom, i evokom, ed utanis, kelis evokom, i evedükom gidikis, ed utanis, kelis evedükom gidikis, i eglorükom.

31. Kisi nog osagobs-li lä atos? If God binom pro obs, kin üfo obinon-li ta obs?

32. Vio om, kel no espalom Soni lönik okik, ab elovegivom omi pro obs valik, no elegivomöv-li obes me om vali?

33. Kin okusadon-li daväläbis? God binom utan, kel libocödetom obis.

34. Kim binom-li cödal, kel micödetom? Kristus binom utan, kel edeadom pro obs; nog plu binom utan, kel elelifikom, kel seadom detü God, e kel i pläidom obis.

35. Kin olivükon-li obis de löf Kristusa? Sumätükam-li, dränäl-li, pöjut-li, faem-li, nüd-li, riskäd-li, gläv-li?

36. Soäsä pepenos in bibapenäd: <Demü ol padeidobs dü del lölik, palecedobs äs jips pugabik>!

37. Ab pö dins valik at vikodobs dub om, kel elöfom obis.

38. Ibä süadob, das ni dead, ni lif; ni silanans, ni magitans; ni dins atimik, ni dins otimik; ni nämäds,

39. ni löpikünos, ni donikünos; ni jafot votik alseimik, okanon livükön obis de löf Goda, kel binon in Kristus: Yesus, Söl obas.

1. Sagob verati, as balan, kel binob in Kristus, e no lugob; dub Saludalanal i konsien obik temunon,

2. das labob glifi gretik, e liedi laidulik ladäla.

3. Viloböv igo pedeteilön de Kristus frutü gems obik: röletans midik obik,

4. kels binons Yisraelänans, kels dalabons gemami, glori, diatekis, lonemi, kulti e promis,

5. lü kels rufats dutoms, e de kels ma mid Kristus licinom, löpü kels valik God binom, kel palelobomöd laidüpio! So binosös!

6. Atos leno sinifon, das prom Goda pefinidon. Ibä no valans, kels licinons se Yisraelän, binons Yisraelänans veratik.

7. Do binons posbinükäbs ela <Abraham>, no ons valik binons cils Yisraeläna; ab in bibapenäds pepenos: <De <Isaac> odagetols posbinükäbis, kels labons nemi olsik>.

8. Atos sinifon: No cils midik binons cils Goda, ab cils, kels pefatons ma prom palecedons binükäbef.

9. Ibä atos binon vöd proma: <Zao ün tim at okömob, e <Sara> olabof soni>.

10. Ed atos no binon teik; i <Rebecca> pegrodükof fa man bal: <Isaac>, hibüröletan obsik.

11. Ibä, ven cils no nog pimotoms, ed idunoms ni gudikosi ni badikosi, dat büjonid pivälöl ölonöfonös, e no öjenonös ma merit, ab ma vil oma, kel älevokom,

12. päsagos ofe: <das bäldikünan odünom yunikünani>,

13. balädü vöd bibapenäda: <Elöfob eli <Iacob>, ed eli <Esau> ehetob>.

14. Kisi osagobs-li tefü atos? Negid binon-li üfo in God? Leno.

15. Ibä ele <Moyses> sagom: <Obenodob utani, keli vilob benodön, ed omiserob utani, keli vilob miserön>.

16. Klu bos no sekidon de utan, kel vilon bosi, u kel töbidon - ab de God miseröl.

17. Bibapenäd sagon ibo faraone: <Ad atos ekoedob bitön oli, ad jonön in ol nämädi obik, ed ad sevädükön nemi obik love tal lölik».

18. Klu miserom utani, keli vilom miserön, e düfälükom utani, keli vilom düfälükön.

19. Nu osagol obe: Kisi täno riprodom-li? Ibä kin etadunon-li föro ta vil omik?

20. Kin ga binol-li, o men! das taspikol Gode? Knidot ga no osagon knidane oka: Kikodo emekol-li so obi?

21. U skalel no labom-li gitodi ad fomön se blög ot taima, e gefi pro geb nobik, e gefi pro geb nenobik?

22. So nu God, ävilöl jonön zuni okik, e sevädükön nämädi okik, esufälom lunasufälo menis, kels esüükons zuni omik, e kels äjonidons ad päridikön,

23. ed ad sevädükön bundani glora okik tefü mens, kels pämiserons, ed äjonidons ad paglorükön;

24. no elevokom-li i obis, no te se yudans, ab i se pagans?

25. Soäsä i esagom in el <Osee>: <Onemob utanis, kels no dutons lü pöp obik, pöpi obik, ed utani, kel no palöfon, löfäbi>;

26. <ed in top, kö pesagos ones: No binols pöp obik, us ponemons cils Goda liföl>.

27. Ed <Isaias> vokädom tefü Yisraelän: <Igo if num cilas Yisraeläna binonöv äsä sab mela, te ret onas posavon;

28. Söl ofölom ed obrefükom gido vödi okik, bi oledunom vödi pubrefüköl okik sui tal>.

29. Soäsä i <Isaias> ebüosagom: «If Söl ela <Sabaoth> no iposbinükom obes posbinükäbis, üvedobs äsä <Sodoma> ed üsümobs ad <Gomorrha>».

30. Kisi osagobs-li täno? Atosi, das pagans, kels no ebesteifons gidükami, edagetons gidükami, efe gidükami se lekred,

31. du elans Yisraeläna, kels ebesteifons lonemi gidükama, no erivons lonemi gidükama.

32. Kikodo-li? Bi ävilons pagidükön no se lekred, ab se vobods oksik. Ed ejokons ta ston skäna,

33. soäsä pepenos: <Ekö! pladob in Siun stoni, len kel jokoy, e blögi klifa skäna. Ed utan, kel lekredon in om, no pojemükon>.

1. O svists! ladäl obik plidon onis, e plekob lü God pro ben onas.

2. Ibä temunob pro ons, das labons lezili pro God, ab no ko dasev.

3. Ibä, bi no sevons gidükami Goda, e steifons ad dagetön oni ma mod lönik okas, no esumätöfükons okis lü gidükam Goda.

4. Ibä lonem efinikon, dubä Kristus elonülom gidükami alane, kel lekredon.

5. <Moyses> penom ga tefü gidükam se lonem: <Men, kel dunon ma on, olifon dub on>.

6. Gidükam se lekred sagon güo: <No sagolöd ninälo: Kin olöpikon-li sülio?> (Sevabo ad doniodugön Kristusi);

7. u: <Kin odonikon-li lü gufur>? (Sevabo ad lelifükön Kristusi se deadam).

8 Ab kisi sagon-li? <Vöd binon nilü ol, in mud olik, ed in ladäl olik>. (Sevabo vöd lekreda, keli predobs).

9. Ibä, if lekoefol ko mud olik Söli: Yesus, e lekredol in ladäl olik, das God elelifükom omi se deadans, obeatol;

10. Ibä me ladäl lekredoy, sodas pagidükoy, e me mud lekoefoy, sodas pabeatükoy.

11. Bibapenäd ga sagon: <Alan, kel lekredon in om, no pojemükon>.

12. Ibä distid no pavedükon vü yudans e Helänans; ibä otan binom Söl valanas, e legivom benedi bundanik valanes, kels lebegons ome.

13. <Ibä alutan, kel vokädon nemi Söla, obeatikon>.

14. Lio nu oplekons-li ome, in kel no elekredons; lio okredons-li in om, dö kel elilons nosi; lio olilons-li dö om, nendas ek epredon dö om?

15. E lio öpredonsöv-li, if no pilesedons? Soäsä pepenos: <Kio plitiks futs utanas binons, kels notädons püdi, kels notädons gospuli>!

16. Ab no valans elilons gospuli. Ibä <Isaias> sagom: <O Söl! kin elekredon-li predi obsik>?

17. Klu lekred davedon sekü pred, e pred jenon sekü komit Goda.

18. Ab sagob: No elilons-li bo oni? Ab no binos, das no elilons oni: <Lü tal lölik vög omsik egolon, lü finods vola vöds omsik

ekömons>.

19. U sagob: Elans Yisraeläna no edasevons-li ba oni? Ab balido <Moyses> sagom: <Ojaludükob olis dö utans, kels no binons net; ozunükob olis ta pöp nen dasev>.

20. Tän <Isaias> riskom ad sagön: <Petuvob fa utans, kels no esukons obi, ed esevädikob pö utans, kels no eseividons obi>.

21. Lü elans Yisraeläna sagom ye: <Dü del lölik etenükob namis obik kol pöp nelobedik ä tadunöl>.

1. Nu sagob: God edeimom-li täno pöpi okik? Vero no. Ibä ob it binob yudan, de posbinükäbef ela <Abraham>, se tribüt ela <Benjamin>.

2. God no edeimom pöpi okik, keli evälom. U no sevols-li, kisi bibapenäd sagon in konot ela <Elias>, ven äplonom lü God dö elans Yisraeläna?

3. <O Söl! Edeidoms profetanis olik, edistukoms lataris olik; te ob eretob, e viloms deidön obi>.

4. Ab lio gespik Goda tonon-li? <Eretükob obe manis velmil, kels no ekienoms lo el <Baal>!

5. Leigoso i nu ret eblibon, kel pevälon benädo.

6. If atos nu jenon sekü benäd, tän no jenon demü vobod, voto benäd no plu binonöv benäd; ed if atos jenonöv demü vobod, tän no plu binonöv benäd, bi vobod no plu binonöv vobod.

7. Kis üfo-li? Utosi, kelosi Yisraelänanef esukon, no edageton; ab väläbs edagetons oni; votans pedüfälükons;

8. soäsä pepenos: <God egivom ones tikäli dölik; logis, kels no logons; lilis, kels no lilons>, jü del adela.

9. I <David> sagom: <Tab onsik vedonös lü ons snal, träp, skänaston, mibläfod!

10. Logs onsik dagikonsös, sodas no logonsös, e bäk onsik pablegükonös>!

11. Sagob kludo: Ga no ejokons-li, dat öfalons? Vero no. Ab sekü midunot onas, i pagans pekompenükons pö beat, ad jaludükön onis.

12. If nu midunot onas eblinon vole beni, e num nefulik onas beni paganes, vioplu num fulik onsik blinonöv benedi.

13. Ibä lü ols, o pagans! spikob; ebo bi binob paostolan paganas, ledigidob cali obik,

14. spelölo ad jaludükön pöpakompenanis obik, e dakipön ananis onas.

15. Ibä if deim onas binon rekosil volanefa, kis lüsum onas binon bos votik, äsä lelifikam se deadans?

16. If nu balidgren binon saludik, tän i pest binon saludik; ed if vul binon saludik, tän i tuigs binons saludiks.

17. If nu tuigs anik pedebreikons, ed ol, sprotian leara natädik, pegrifol pla ons, e so frutidol de vul e binäl leara,

18. tän no pleidülolöd lo tuigs! If ga vilol pleidülön, betikolod täno, das no ol polol vuli, ab vul polon oli!

19. Nu osagol: Tuigs et pedebreikons, dat ob pögrifob.

20. Gudö! Pedebreikons demü nelekred oksik, ed ol stanol demü lekred. No lecedolöd oli tu löpiki, ab labolöd dalestümi!

21. If nu God no espalom tuigis legik, bo i no ospalom oli.

22. Logolöd kludo benädi e seväri Goda! seväri tefü utans, kels efalons, e benädi kol ol, if pö benäd nemu olaidälol; voto i ol podecöpol.

23. E votans nu, if no baidälons pö nelekred oksik, pogrifons dönu, ibä God labom nämädi ad dönugrifön onis.

24. If nu ol pedekötol de bim, kel binon natälo lear natädik, e pegrifol ta natäl olik sui lear legik, vioplu uts, kels dutons natälo lü ons, pogrifons sui lear lönik oksik.

25. Sekü atos, no vilob, o svists! das no sevols müsteri at, dat no binolsös fatüitabapiks! das düfäl ekömon ad dil Yisraelänanas, jüs pagans valik uslopikons;

26. e so Yisraelän lölik podakipon, soäsä pepenos: <Se Siun savan okömom, ed odeflekom dunis nen-Godik de <Iacob>,

27. ed in atos diatek oba ko ons dabinon, das omoükob sinodis onsik>.

28. Ma meug onsik tefü gospul binons neflens olsik, ma väl onas binons ye demü rufats löfäbs;

29. ibä benädagivots e lüvok Goda binons nepidabiks.

30. Ibä leigoäsä i ols ebinols seimna nelobediks kol God, nu pemiserols dub nelobed onas,

31. so i ons nu evedons nelobediks, dat i pomiseronsös!

32. Ibä God ekobokipom onis valik, dat ölobedonsöv, ed om ömiseromös onis valik!

33. Kio dibätiks bundan sap e sev Goda binons! kio nedaseivoviks cödets oma! kio netüvoviks vegams oma!

34. <Ibä kim esevom-li lüäli oma? U kim ebinom-li dakonsälan oma>?

35. <U kim egivom-li büo bosi ome, sodas at muton pabläfön ome»?

36. Ibä se om, dub om, lü om dins valik binons. Stim binonös laidüpio lü om! So binosös!

1. Dabegob kludo oles, o svists! nämätü miser Goda, ad dedietön koapis olsik, asä sakrifoti lifik saludik lü God plitiki; me atos kult tikälik olsik binädon.

2. No leigafomolsöd olis ad volanef at, ab feafomolsöd olis dub nulul ladäla olsik, dat dasevolsös, kis vil Goda binon; kis gud, plit, lölöf binons!

3. Nämätü benäd obe pelegivöl komandob alane olas, ad no digidön mödikumo okis, kas binos gidöfik, ab ad digidön süeniko okis; alan ma mafäd lekreda, keli God elüdutükom one.

4. Ibä leigoäsä labobs in koap bal limedis mödik, limeds valik kelik no dunons vobodi ot,

5. so obs valik binobs kobo koap bal in Kristus, ed alans obas binons limeds odsik,

6. kels labons, ma benäd obes pelegivöl, tälenis distik. If labol täleni profetama, gebolöd oni baiädü lekred olik!

7. ud uti düna, zeilolöd ad dünön! ud uti tida, tidolöd!

8. ud uti predama, predolöd! If labol bosi ad paseagivön, dunolöd osi balugiko! If binol dugan, binolöd atan ziliko! If miserol, dunolöd osi fredaladälo!

9. Löf binonöd stedälik! Naudolöd badi! Löfolöd gudi!

10. Löfolsöd ladöfiko odis, äsä blods! Jonülolsöd odes stimi!

11. No trögolsöd, ab binolsöd ziliks, lanäliks! Dünolsöd Söli!

12. Binolsöd fredaladäliks sekü spel, e sufodolsöd pö dränäl! Laidälolsöd in plek!

13. Fölolsöd neodis saludanas! Zeilolsöd ad binön lotidiäliks!

14. Benedolsöd utanis, kels pöjutons olis! Benedolsöd, ab no maleditolsöd!

15. Fredolsöd ko utans, kels fredons, e drenolsöd ko utans, kels drenons!

16. Binolsöd baläliks bevü ods, no labolsöd tikodis pleidik, ab lönülolsöd ad mükikans! No binolsöd fatüitasapiks!

17. No bläfolsöd eke badi me bad, ab binolsöd flenöfiks kol mens valik!

18. Dakipolsöd ma fäg olsik mögiküno püdi ko mens valik!

19. No vinditolsöd! o löfäbs! ab letolsöd osi ome, kel dalom zunön! Ibä pepenos: <Vindit duton lü ob; obläfob osi, Söl spikom>.

20. Güö! if neflen olik faemon, zibolöd oni! if soafon, givolöd one bosi ad drinön! Ibä somo, kumol kolatis filik sui kap onik.

21. No letolöd, das bad vikodon oli, ab vikodolöd badi medü gud!

1. Alan sumätikonöd lo nämädans, kels pepladoms löpü on. Ibä nek labon nämädi, äsä dub God; e nämäds dabinöl pestidons fa God.

2. So kludo alutan, kel tadunon cifodi, taon ta büdül Goda; e taans et okodädons okes micödeti.

3. Ibä no nedol dredön demü cifodans, if kondötol gudiko, ab sio, if kondötol badiko. If nu no vilol dredön demü cifod, kondötolöd täno gudiko! e polobol fa on.

4. Ibä binon dünan Goda, ad ben ola. Ab if kondötol badiko, tän dredolöd! ibä no polon säbi nenzeilo, ab bi binon dünan Goda, kel ledunon pönodi midunane.

5. Sekü atos zesüdos ad sumätöfön, no te demü pönod, ab i demü konsien.

6. Sekü atos i mutols pelön tripis, ibä utans, kels jäfoms laidulo me atos, binoms dünans Goda.

7. Givolsöd kludo valanes uti, kel duton lü ons! Tripi, if debols tripi; toli, if mutols tolön; dredi, if dredols; stimi, if mutols jonülön stimi.

8. No debolsöd eke bosi, äsä löfi odes! ibä utans, kels löfons odis, efölons lonemi.

9. Ibä büdeds: <No sötol dulterön! no sötol deidön! no sötol tifön! no sötol ledesirön! u büded alseimiko votik, pekobosumons in büded bal at: <Sötol löfön kemeni olik, äsä oli it>!

10. Löf no blinädon dämi kemene; klu löf binon föl lonema.

11. Betikolsöd pö atos, das sevols timadinädi! das binons pro obs pötatim, ad galikön se slip; ibä beat binon nu nilikum lä obs, kas tü tim, kü älüsumobs lekredi.

12. Neit epasetikon gretadilo, del binon nilik. Klemobsöd kludo vobodis daga, e klotobsöd obis me vafem lita!

13. Kondötobsöd ai gidöfiko, äsä kösömobs ad dunön dü del! no in ludrinakobikams e briet, no in nepued e nestön, no in komip e jalud!

14. Ab dütolsöd oles binäli Söla: Yesus Kristus, e no kälolsöd midi ad süükön in on ledesiris!

1. Lasumolsöd ini komot utani, kel binon fibälik in lekred, ab no ad disputön tefü ladäladods onik!

2. Balan lekredon, das dalon fidön vali, e fibälan fidon härbatis.

3. Utan, kel fidon vali, no ludigidonöd utani, kel no fidon vali, ed utan, kel no fidon vali, no micödonöd utani, kel fidon vali! ibä God elüsumom oni.

4. Kin binol-li, kel cödol dünani votana? Atan ye stanon u falon ma meug söla lönik okik. Ab oblebon stanön, ibä God labom nämädi ad koedön stanön oni.

5. Atan lecedon deli bal löpikumi ka votiki; etan lecedon onis valik leigavöladikis. Alan labonöd in ladäl lönik okik süadi fulik!

6. Utan, kel distidon delis, dunon atosi stimü Söl, ed utan, kel no distidon delis, i dunon atosi stimü Söl. Ed utan, kel fidon vali, dunon atosi stimü Söl, ibä danon Godi; ed utan, kel no fidon vali, dunon atosi i stimü God, e danon i Godi.

7. Ibä nek obas lifon demü ok it, e nek deadon demü ok it.

8. Ven lifobs, lifobs in kult Söla, e ven deadobs, deadobs pro Söl. Klu, va lifobs, u va deadobs, dutobs lü Söl.

9. Ibä demü atos Kristus edeadom ed elelifikom, dat öreigom deadanis e lifölanis.

10. Ed ol-li, kikodo cödol-li svisti olik, ud ol-li, kikodo ludigidol-li oni? Obs valik popladobs ga foi cödalastul Kristusa.

11. Ibä pepenos: <Dü tim, kü lifob, Söl sagom, alan obiegon kieni okik lo ob, e nets valik olekoefons Godi>.

12. Klu alan obas ogidükon oki lo God.

13. No cödobsöd kludo plu odis, ab betikobsöd buikumo ad no tupön u skänön svisti!

14. Sevob, e sekü kosäd ko Söl: Yesus süadob, das nos binon okao neklinik; ab pö utan, kel lecedon bosi nekliniki, atos binon neklinik.

15. If svist olik paliedükon dub zib seimik, tän no kondötol löfo. No päridükolöd dub zib olik eki, pro kel Kristus edeadom!

16. Klu no mirepütükolsöd dini gudik olsik!

17. Ibä regän Goda no binädon me zib e drined, ab me gid, püd e fred dub Saludalanal.

18. Ibä utan, kel dünon me atos Kristusi, pliton Godi, e pastimon fa mens.

19. Steifobs kludo ad dagetön püdi e devodükön odis.

20. No rübükolöd demü zib vobodi Goda! Val binon klinik; ab vi! lü men, kel skänon dub fid okik.

21. Binos lobabik ad no fidön miti, ad no drinön vini, ud ad no dunön bosi, kel tupon, u skänon svisti olik, u fibälükon oni.

22. Dakipolöd lekredi ninälo, jonolöd oni te Gode! Beatik utan binon, kel no cödon oki ma utos, keli elecedon gudiki.

23. Ab utan, kel doton, ven fidon, ya pemicödon, bi no dunon ma lekred; ibä val, kel no binon sekü lekred, binon sinod.

1. Obs, kels binobs nämäliks, labobs bligi ad sufälön fiböfis fibälanas, e no mutobs plitön obis it.

2. Balan obas plitonöd kemeni okik ad benükön e devodükön oni!

3. Ibä i Kristus no eplitom oki it, ab binos, äsä pepenos: <Lukofs utanas, kels ekofons oli, edrefons obi>.

4. Ga val, kel pepenon büikumo, pepenon ad tidam obas, dat dub sufäd obsik, e sekü stigäd dub bibapenäds pegivöl, labobsös speli!

5. God nu, de kel sufäd e stigäd süikons, kodomös oles, das labols bevü ods meugi ot, äsä Kristus: Yesus älabom!

6. dat glorükolsös balälo, äsä se mud bal, Godi ä Fati Söla obsik: Yesus Kristus!

7. Lüsumolsöd kludo odis! äsä i Kristus elüsumom obis, ad glorükam Goda.

8. Nu sagob: Yesus: Kristus evedom dünan säprepüdama demü verat Goda, ad lesiön promis rufates pidunölis,

9. e dat pagans oglorükons Godi demü miser pedagetöl, soäsä pepenos: <Sekü atos oleadob lekoefön oli bevü pagans, e psamikanitön stimü nem ola>.

10. Ed in top votik bib sagon: «Fredolsöd, o nets! ko pöp omik»!

11. Ed in top votik: <Lobolsöd ols valik, o nets Söli! e nets valik lobonsöd omi»!

12. Ed in top votik <Isaias> sagom: <Vul ela <Isai> odabinon, ed utan odabinom, kel oreigom netis; ed omi nets ospelons>.

13. God nu, de kel spel kömon, fulükomös olis me fred e püd valiks dub dalab lekreda; dat labolsös bundano speli dub nämäd Saludalanala!

14. Ob it süadob, o svists! das i ols fulols me gud, labols bundano nolis valasotik, e fägols ad meibön odis.

15. Penäd obik binon dilo boso künik, o svists! bi ävilob mebön oles bosi sekü benäd obe fa God pigivöl,

16. sevabo, das binob dünan Kristusa: Yesus pro pagans, kel dunob vobodi saludik demädü gospul Goda, dat sakrifot paganas binonös plitik, ä pasaludükonös dub Saludalanal!

17. So labob fami dub Kristus: Yesus dö dins Godi teföls.

18. Ibä no okünob ad spikön dö din votik seimik, äsä dö utos, keli Kristus edunom medamü ob ad koedön lobedön paganis me vöd e vobod,

19. me näm malas e milagas, me nämäd Saludalanala; sodas enotükob fuliko gospuli Kristusa ini topäds valik de <Hierusalem> jü Lilürän,

20. du ästeifob lezilo ad notükön gospuli us, kö no nog ispikoy dö Kristus, dat no öbumob su stababumäd votanas,

21. ab dat öjenos ma pepenölos in bibapenäd: <Utans, keles nos penotükon dö om, ologons omi, ed utans, kels elilons nosi, osuemons osi>.

22. Sekü atos i peneletob ad golön lü ols;

23. ab bi nu no plu labob spadi ad vobön in topäds at, e dü yels mödik edesirob ad logön olis,

24. so ogolob lü ols, ven otävob lü Spanyän, ibä spelob ad logön olis pötü dutäv obik, ed ad pasedugädön fa ols, posä ujuitob büiko boso komi olas.

25. Ab nu tävob lü <Hierusalem>, ad dünön saludanis;

26. ibä elans Makedonäna e Lagayäna eplidons ad givön läükoti pro pöfans bevü saludans in <Hierusalem>.

27. Eplidons ga ad dunön atosi, e labons i bligi ad atos. Ibä, if pagans kompenons pö duns lanöfik onas, tän i labons bligi ad dünön onis me legivots stöfik.

28. Posä ufidunob atosi, ed uloveblinob sefiko ones legivoti at, otävob kludo vegü zif olas lü Spanyän;

29. e sevob, das, ven kömob lü ols, okömob ko bened bundanik Kristusa.

30. Begob kludo vemo oles, o svists! nämätü Söl obsik: Yesus Kristus, e löf Lanala, ad kekomipön ko ob dub plekön Gode pro ob,

31. dat posavobös se nams nelekredanas in Yudän, e das dün, keli mutob jonülön elanes di <Hierusalem> obinonös benik lü saludans!

32. dat, if God vilom, olükömobös fredo lü ols, ed otakädobös lä ols!

33. God püda binomös lä ols valik! So binosös!

1. Komandob oles jisvisti obsik: <Phoebe>, jidiakan komota in <Cenchreae>;

2. dat getedolsös ofi asä jilekoefani Söla, äsä pötos kol saludans, e yufolsös ofi pö din alik, in kel oneodof bo yufi olsik! Ibä ebinof jiyufan pro ömans, i pro ob.

3. Glidolsöd elis <Prisca> ed <Aquila>, kevobanis obik in Kristus: Yesus,

4. kels eriskons särvigis oksik pro lif obik, lü kels no te ob, abi komots valik paganas, danöfobs!

5. Glidolsöd i limanis komota, kels kobikons in dom onsik! Glidolsöd i eli <Epaenetus> fa ob palöföli, kel äbinom in el <Asia> balidan, kel äslopikom Kristusi.

6. Glidolsöd eli <Maria>, kel etöbidof vemo pro ols!

7. Glidolsöd elis <Andronicus> e <Iunia>, röletanis ä kefanäbis obikis, kels äfamons pö paostolans, e kels eslopikons bü ob Kristusi!

8. Glidolsöd eli <Ampliatus>, fa ob in Söl palöföli!

9. Glidolsöd eli <Urbanos>, kevobani obik in Kristus, ed eli <Stachys>, palöföl obik!

10. Glidolsöd eli <Apelles>, dünani konfidovik Kristusa, ed utanis, kels dutons lü famül ela <Aristobulus>!

11. Glidolsöd eli <Herodio>, röletani obik! Glidolsöd slopanis Kristusa, kels binons in dom ela <Narcissus>!

12. Glidolsöd elis <Tryphaena> e <Tryphosa>, kels vobofs in dün Söla! Glidolsöd eli <Persis>, jilöfäbi, kel evobof mödiko in dün Söla!

13. Glidolsöd eli <Rufus> fa Söl pevälöli, e moti omik äd obiki!

14. Glidolsöd elis <Asyncritus>, <Phlegon>, <Hermes>, <Patrobas>, <Hermas>, e hisvistis, kels binoms lä oms!

15. Glidolsöd elis <Philologus> e <Iulia>, eli <Nereus> e söri omik, ed i eli <Olympias> e saludanis valik, kels binons lä ons!

16. Glidolsöd odis ko kid saludik! Komots valik Kristusa glidons olis.

17. Konsälob oles, o svists! ad küpedön utanis, kels süükons pö ols teläli e skani ta lejon, keli edagetols. Deflekolsöd olis de ons!

18. Ibä somans no dünons Söli obsik: Kristus, ab bälidi oksik, e cütons me vöds svidik e spikods jönik oksiks ladälis nenbadiniludik.

19. Ibä lobed olsik esevädikon pö valans; sekü atos fredikob dö ols, e vilob, das binols sapiks, e dunols gudi, e binols neblamabiks ta bad.

20. E God püda otroivom suno diabi dis futs olsik. Benäd Söla obsik: Yesus Kristus binonös lä ols!

21. Glidoms olis el <Timotheus>: kevoban obik, ed els <Lucius>, <Iason>, e <Sosipater>: röletans obik.

22. I ob: <Tertius>, kel epenob in dün Söla penedi, glidob olis.

23. Glidom olis <Gaius>: lotidan oba e komota lölik. Glidoms olis el <Erastus>: guvan zifa, e <Quartus>: blod omik.

24. Benäd Söla obsik: Yesus Kristus binonös lä ols valik! So atos binonös!

25. Lü om nu, kel fägom ad nämükön obis, ma lejon fa ob penotüköl, e penotüköl fa Yesus: Kristus, e ma dasevädükam müstera, dü tumyels klänika,

26. kel nu pesevädükon, e sekü büd Goda laidüpik pesevädükon dub penäds profetik lü nets valik, ad palobedön;

27. lü om, lü God sapik balik, dub Yesus: Kristus glor duton laidüpio. So atos binonös!

---------- oOo ----------

1. <Paulus>: sekü vil Goda paostolan vokedöl Yesusa: Kristus e hisvist: <Sostenes>,

2. komote Goda: utanes, kels pesaludükons in Kristus: Yesus, saludanes pevälöl, ed i valanes in tops valik, kels lüvokädons nemi Yesusa: Kristus, Söl onas ed obas.

3. Benäd e püd binonsös lü ols dub God: Fat obas e Söl: Yesus Kristus!

4. Danob ai Godi obik dö ols demü benäd Goda oles pegivöl in Kristus: Yesus,

5. das in tefs valik eliegikols in om, in spikam, ed in nol alik.

6. Temunod dö Kristus efümikon so pö ols,

7. das pö nek nepluols demü legivot alseimik, ön spet dasevädükama Söla obsik: Yesus Kristus,

8. kel okoedom fümön olis jü fin, sodas obinols neblamabiks ün del Söla obsik: Yesus Kristus.

9. God fiedom, fa kel pevälols ad kompen ko Son omik: Yesus Kristus, Söl obsik.

10. Lebegob oles, o svists! nämätü nem Söla obsik: Yesus Kristus, das ols valik binolsös baläliks, das lekredaslit no binonös bevü ols, das laidolsös in siäm ot e meug ot!

11. Ibä tefü ols, o svists! fa domakompenans ela <Chloe> penunos obe, das teläl dabinon bevü ols.

12. Sevabo, das seimans olas sagons: Dutob lü <Paulus>, dutob lü <Apollo>, dutob lü <Cephas>, dutob lü Kristus.

13. Kristus pedilom-li? <Paulus> ga no pekrodom pro ols; ols ga no peblunedols ön nem ela <Paulus>!

14. Danob Godi, das eblunedob neki olas, plä el <Crispus> ed eli <Gaius>.

15. Voto ek bo sagonöv, das eblunedob-la ön nem obik.

16. Eblunedob i nog domanefi ela <Stephanas>; fovo no sevob, das eblunedob votani.

17. Ibä Kristus no elesedom obi ad blunedön, ab ad predön gospuli; no me vöds letäläktik, dat krodam Kristusa no ovanikon.

18. Ibä pred krodama binon fop pro utans, kels opäridikons, ab binon pro obs, kels podakipobs, näm Goda.

19. Ibä pepenos: <Onosükob sapi sapanas, ed odistukob täläkti täläktanas>.

20. Kiöpo sapan binom-li? Kiöpo bibinolavan binom-li? Kiöpo vestigan nolik säkädas levala binom-li? God no evedükom-li fopiki sapi volanefa?

21. Bi nu sekü sap Goda, volanef pö sap okik no edasevon Godi; God esludom ad savön lekredanis me fop predama.

22. Du nu yudans desirons milagis, e Helänans sukons sapi,

23. obs predobs Kristusi pekrodöl; skäni lo yudans, fopi lo pagans,

24. ab väläbes: e yudanes e Helänanes, predobs Kristusi as näm Goda e sap Goda.

25. Ibä fop Goda binon sapikum ka sap menas, e fib Goda binon nämikum ka näm menas.

26. Ibä küpälolsöd, o svists! ad voked olsik! No mödikans olas binons ma mafäd menik sapans, nämädans, u lemotedäbs.

27. Ab God evälom utosi, kelos binon fopik lo volanef, ad jemükön sapanis, ed utosi, kelos binon fibik lo volanef, God evälom ad jemükön nämädanis,

28. ed utani, kel binon lumotedik lo volanef, ed utosi, kel paludigidon, God evälom, ed utosi, kel no dabinon, ad nennämükön utosi, kel dabinon,

29. dat jafäb nonik pleidülonös lo God-

30. Ibä dub om binols in Kristus: Yesus, kel evedom pro obs demü God sap, gid, saludükam, e libükam;

31. dat, soäsä pepenos: <Utan, kel pleidülon, pleidülonöd demü Söl>!

1. I ob, o svists! ven äkömob lü ols, no ekömob ad notükön oles ko bundan vödas e sapa temunodi Goda;

2. ibä isludob ad sevön bevü ols no bosi, äsä Yesusi: Kristus; omi, kel pekrodom.

3. I äbinob bevü ols in fib, in dred, ed in drem mödik;

4. e spikäd e pred obiks no äbinädons me vöds süadüköl sapa, ab me jon lanöfa e näma,

5. dat lekred olsik no pöstabon sui sap menik, ab sui näm Goda.

6. Ga notükobs sapi bevü daülans, ab sapi, kel no binon de vol at, ni de cifodans vola at, kels ponosükoms;

7. ab notükobs sapi müsterik Goda, kel piklänedon, e pibüojonidon fa God laidüpio ad glor obas.

8. Nek cifodanas vola at edasevom osi, (ibä, if idasevomöv osi, no ükrodomöv Söli glorik).

9. Ab atos ejenon, soäsä pepenos: <Utos, kelosi log no elogon, kelosi lil no elilon, kelos no esüikon in ladäl menik, kelosi God epreparom utanes, kels löfons omi>.

10. Ab obes God esevädükom osi dub Lanal okik; ibä Lanal davestigon vali, igo dibätis Goda.

11. Kin menas ga sevon-li utosi, kelos binon in men, plä lanöf, kel binon in on? Somo i nek edasevon utosi, kelos binon in God, plä Lanal Goda.

12. Obs nu no edagetobs lanöfi vola, ab lanöfi, kel kömon de God, dat ösevobsöv legivotis benädik Goda lü obs.

13. Dö atos no spikobs in vöds dub sap menik petidöls, ab in vöds, kelis lanöf tidon obes, du plänobs dinis lanöfik utanes, kels lüälons lanöfiko.

14. Men dinöfälik ye no lüsumon utosi, kelos kömon de Lanal Goda; ibä atos binon lü on fopik. I no fägon ad suemön osi, bi atos muton pacödön lanöfiko.

15. Men lanöfiko lüälöl cödon sio vali, ab on it kanon pacödön fa nek.

16. <Ibä kin esevon-li lüäli Söla, ad suemön omi>? Obs ye dalabobs lüäli Kristusa.

1. Ed ob, o svists! no äkanob spikön lü ols, asä lü mens lanöfiko lüälöls, ab asä lü mens midik, asä lü cils lo Kristus.

2. Enulüdob olis me milig, no me zib solidik; ibä no äfägols ad sufidön oni. Igo nu no fägols ad sufidön oni,

3. bi nog binols midiks. Ibä, dü tim, das jalud, feit e teläl nog dabinons bevü ols, no binols-li üfo midiks, e no dunols-li üfo asä mens talediko lüälöls?

4. Ibä, if balan sagon: Ob dutob lü <Paulus>, e votan: Ob dutob lü <Apollo>; no binols-li üfo mens midik?

5. Kis nu <Apollo> binom-li? Kis <Paulus>-li? Binoms dünans, dub kels edagetols lekredi; alan, maä Söl egivom oni ome.

6. Ob eplanob, <Apollo> ebegifülom, ab God ekoedom glofön.

7. Klu no utan, kel planom, binom bos; ni utan, kel begifülom, ab God, kel koedom glofön.

8. Ed utan, kel planom, ed utan, kel begifülom dutoms lü od, ed alan omas ogetom mesedi okik ma töbid okik.

9. Ibä binobs kevobans Goda, ed ols binols feilaläned Goda, bumot Goda.

10. Ma benäd fa God obe pegivöl ebumob, äsä bumavan täläktik, stababumädi, e votan bumon su at. Alan nu küpälonöd, vio bumon!

11. Ibä nek kanon seitön stababumädi votik, äsä uti, kel peseiton, sevabo Yesus: Kristus.

12. Aluti, keli ek bumon su stababumäd at, va binon: gold, largent, stons jerabik, boad, stol, stagod;

13. völad voboda alana osevädikon; ibä del cödetama lätik okleilükon osi; bi dub fil atos posevädükon, e fil at oblufon

kalieti voboda alana.

14. If vobod eka sufidon blufi, tän ogeton mesedi.

15. If vobod eka fefilon, tän olabon dämi; on it ye podakipon, do poviodon dub fil.

16. No sevols-li, das binols tem Goda, e das Lanal Goda lödon in ols?

17. If ek peridükon temi Goda, tän God operidükom oni; ibä tem Goda binon saludik, ed at ols binols.

18. Nek cütonöd oki it! If ek bevü ols cedonöv, das binon sapik in vol at, tän vedonöd fopik, ad vedön sapik!

19. Ibä sap vola at binon fop lo God. Ga pepenos: <Utan, kel gleipon sapanis in lekäf onsik>.

20. Ed in top votik: <Söl sevom, das vätäls sapanas binons vaniks>.

21. Nek pleidülonöd kludo ad mens; ibä val duton lü ols:

22. el <Paulus>, el <Apollo>, el <Cephas>, vol, lif, dead, dins nuik, dins fütürik, val duton lü ols;

23. ab ols dutols lü Kristus, e Kristus lü God.

1. Klu lecedoyöd obis hidünanis Kristusa, e guvanis müsteras Goda!

2. Fovo, de guvans paflagos, das pacedoms fiediks.

3. Ob nu cedob mu püliki, va pacödetob fa ol u fa cödalef menik seimik. Si! no cödetob i obi it.

4. Sio no sevedob, das edunob bosi badik, ab dub atos no pegidükob; Söl binom utan, kel cödetom obi.

5. No cödetolsöd kludo tu suniko, no büä Söl kömom, kel osäklänedom utosi, kel peklänedon in dag, ed osevädükom vätälis ladäla; ed alan ogeton de God lobi, kel duton lü on.

6. Atosi, o svists! egebädob pö ob it e pö <Apollo> demü ols; dat lärnolsös dub obs, ad no niludön olis löpü utos, kelos pepenon, e dat nek olas pleidülolös lo votan demü seiman!

7. Ibä kin givon-li ole buami at? Kisi dalabol-li, kelosi no egetol? Ed if binos bos, kelosi egetol, sekü kis täno pleidülol-li demü atos, äsva no pigeton?

8. Lesi! ya satols; ya liegols; ereigols plödü obs; vö! ivilob-la, das äreigols, dat i obs ökereigobs ko ols.

9. Ibä cedob, das God edajonom obis, paostolanis lätik, äsä pecödetölanis ad deadam; ibä evedobs jonetot pro volanef, pro silanans e mens.

10. Obs binobs fopiks lo Kristus, ed ols dasevols Kristusi; obs binobs fibiks, ols binols nämiks; ols paglorükols, obs panestimobs.

11. Jü atim faemobs, soafobs, nüdobs, paflapobs e no labobs fimalödis.

12. Töbidobs me namavob. If palunofobs, benedobs; if papöjutobs, sufälobs;

13. if paslänobs, trodobs. Evedobs äsvo sinodahikapars vola, jünu moükabot valanas.

14. No penob atosi ad jemükön olis, ab ad nunedön olis, as cils palöföl obik.

15. Ibä if älabolsöv dugälanis mu mödikis in Kristus, tän ga no älabols fatis mödik; ibä dub gospul ob evedükob olis slopanis Kristusa: Yesus.

16. Klu stigädob olis ad vedön züpans oba.

17. Ebo demü atos elesedob oles eli <Timotheus>, kel binom son palöföl ä fiedik obik in Söl. Omebom oles, vio ekondötob in dün Kristusa, ed in mod kinik etidob valöpo in komot alik.

18. Äcedölo, das no ökömob, alans evedons pleidäliks.

19. Okömob ye suno lü ols, if God vilom osi, tän no oseivob vödis menas pleidälik et, ab utosi, kelosi fägons ad dunön.

20. Ibä regän Goda no binädon me vöds, ab me näm.

21. Kisi vilol-li? Okömob-li lü ols ko dabat, u ko löf e sofäl?

1. Liloy valemo, das nepued dabinon bevü ols, ed igo nepued somik, kel no dabinon bevü pagans, sevabo, das ek labom jimatani fata okik.

2. E binols igo pleidäliks, plas lügols, dat utan, kel edunom somikosi pamosumomös se zänod olas!

3. Fe äfabinob koapo, ab lanöfo äkomob lä ols, ed ob, äsva äbinob lä ols, ya esludob tefü utan, kel so edunom,

4. das obs, nämätü Söl obsik: Yesus Kristus, posä ukobikobs ko näm Söla obsik: Yesus Kristus,

5. lovegivobs omi ad päridikön koapo diabe, dat lan omik padakiponös ün cödetamadel Söla!

6. Pleidül olsik no binon gudik. No sevols-li, das lefapest nemödik koedon lefön pesti lölik?

7. Moükolsöd kludo femapesti vönädik! dat binolsös pest nulik, äsä binols jenöfo bod nenfemik. Ibä pajatajipül i pepugon pro obs: Kristus,

8. Klu no zälizelobsöd in femapest vönädik, ed i no in ut bada e bapa, ab in ut klina e verata,

9. Epenob oles in pened obik ad no kosädön ko nepuedans.

10. Klüliko no ediseinob nepuedanis vola at, ni vukanis, ni ravanis, ni lugodikultanis; ibä täno omutolsöv segolön se vol at.

11. Ab nu epenob oles ad no kosädön ko ek, kel panemon svist ä binon nepuedan, u vukan, u lugodikultan, u slänan, u ludrinan, u ravan; ko somans igo no mutols fidön.

12. Ibä sötob-li cödön utanis, kels binons plödü sog obsik? No sötols-li cödön utanis, kels binons in sog olsik?

13. Utanis, kels dabinons plödo, God ocödom. Moükolsöd ols badani se komot olsik!

1. If balan olas labol ta votan feitadini, künol-li täno ad cödädön demü at lo nenlekredans, e no lo saludans?

2. No sevols-li, das saludans ocödons voli? Ed if fägols ad cödön voli, no gitodol-li täno ad cödön dinis pülik?

3. No sevols-li, das ocödobs silananis? Vio plu-li üfo dinis volädik?

4. If nu labols cödädadinis volädik, cälols-li täno limanis läs völadikis asä cödalis?

5. Ad jemükön olis sagob: Bevü ols täno man no bal dabinom-li, kel binom saidiko sapik, ad kanön cödön bevü svists okik?

6. Pla atos svist cödädon ta svist, efe lo nenlekredans.

7. Jenöfo leno pötos, das feitadins dabinons bevü ols, das labols cödädis ta ods. Kikodo no buükols-li ad sufön negidi? Kikodo no buükols-li ad sufön dämi?

8. Pla atos dunols negidi, e blinols votanes dämi, ed atosi fe svistes!

9. U no sevols-li, das negidans no okompenons pö regän Goda? No cütolsöd olis it: Ni nepuedans, ni lugodikultans, ni dulterans, no otgenageniälans, ni päderastans,

10. ni tifans, ni vukans, ni slänans, ni ravans okompenons pö regän Goda!

11. Ed atans anans olas äbinols; ab peklinükols, pesaludükols, pegidükols nämätü nem Söla: Yesus e Lanal Goda obsik.

12. Dins valik pedälons obe, ab no dins valik frutons; dins valik pedälons obe, ab no oleadob reigön obi dub din seimik.

13. Zibs binons pro bälid, e bälid binon pro zibs; e God onosükon bofis. Koap ye no binon pro nepued, ab duton lü Söl, e Söl dutom lü koap,

14. e God elelifükom Söli, ed olelifükom i obis dub näm okik.

15. No sevols-li, das koaps olsik binons limeds Kristusa? Osumob-li nu limedis Kristusa, ed ovedükob-li onis limedis nepuedana? Atos leno jenonös!

16. U no sevols-li, das utan, kel kosädom ko jinepuedan, binom ko of koap bal? <Ibä bofikans obinons mid bal> bibapenäd sagon.

17. Ab utan, kel slopikon Söli, vedon ko om lanan bal.

18. Befugolsöd nepuedi! Sinod alik, keli men dunon, no tefon koapi, ab utan, kel nepuedon, sinon ta koap lönik okik.

19. No sevols-li, das koap olsik binon tem Saludalanala in ols, keli egetols de God, e das no lüdutols lü ols it?

20. Ibä peremols jeriko. Klu glorükolsöd Godi me koap olsik [e lan olsik, kels dutons lü God]!

1. Tefü utos, nu, dö kelos epenols obe: binos gudik pro man, ad no kontagön vomi;

2. ad vitön nepuedi, man alik sötom labön jimatani lönik okik, e vom alik sötof labön himatani lönik okik.

3. Man fölomöd matabligi kol jimatan okik, e leigo i vom kol himatan okik!

4. Vom no labof dagebi lelivik koapa lönik okik, ab himatan; leigo i man no labom dagebi lelivik koapa okik, ab jimatan.

5. No stönolsöd odi, bisä ma plüd rezipik dü tim anik, dat kanols dedietön olis pleke, e täno kobokömön dönu lü od, efe dat diab no bätodomös olis demü juitiäl olsik!

6. Sagob atosi oles sekü däläl, no as büd.

7. Viloböv ga sio, das mens valik binonsöv äsä ob binob, ab alan edageton de God tälenüli lönik okik; atan ati, etan eti.

8. Noematölanes e jiviudanes sagob, das binos gudik pro ofs ad blebön äsä ob binob.

9. Ab if no kanofs reigön okis, tän matofsöd! ibä binos gudikum ad matön, kas ledolön sekü ledesir.

10. Ematölanes pabüdos, no ob dunob atosi, ab Söl, das vom no dalof teilön oki de himatan,

11. (if ga dunof atosi, tän sötof blebön nenmatik, u rekosilön ko himatan okik), e man no dalom dejoikön jimatani okik.

12. Votanes ob sagob, no Söl: If hisvist labom jimatani nenlekredik, ed of plidof ad kobolifön ko om, tän no dejoikomöd ofi!

13. Ed if vom labof himatani nenlekredik, ed om plidom ad kobolifön ko of, tän no dejoikoföd omi!

14. Ibä man nenlekredik pesaludükom dub jimatan okik, e vom nenlekredik pesaludükof dub hisvist; voto ga cils binonsöv nenkliniks, e jenöfo binons saludiks.

15. If nenlekredan vilon teilön de votan, tän teilonöd! Pö jenets at, hisvist u jisvist no binons bligöfiks. God evokom ga obis ad püd.

16. Ibä lio sevol-li, o vom! va odakipol himatani olik? U lio sevol-li, o man! va odakipol jimatani olik?

17. Ab alan kondötonöd, soäsä Söl elonom pro on, e ma stad, in kel God evokom oni. So ebüdülob in komots valik.

18. If ek pevokom, ven pisäprepüdom, tän no sädunomöd atosi!

If ek pevokom, ven no pisäpredüdom, tän no pasäprepüdomöd!

19. Säprepüdam no veüton, e lab prepüda no veüton, ab föl büdedas Goda binon veütik.

20. Alan blebonöd in stad, in kel pevokon!

21. If pevokol, ven äbinol slafan, no kudolöd demü atos! Igo if kanolöv vedön libik, blebolöd buiko atan!

22. Ibä slafan, kel pevokon in Söl, binon libükäb Söla. So leigo liban pevoköl binon dünan Söla.

23. Peremols jeriko; no vedolsöd slafans menas!

24. Alan olas, o svists! blebonöd lo God in stad, in kel pevokon!

25. Tefü jivirgans, no labob büdi Söla, ab givob cedi obik asä utan, kel sekü miser Söla binob konfidovik.

26. Cedob nu, das demü ditret kömöl binos gudikün pro men ad dunön so:

27. If labol bligöfi kol vom, tän no steifolöd ad matiteilön; if no labol bligöfi kol vom, tän no sukolöd vomi!

28. If matikol, tän no dunol sinodi, ed if jiyunan matikof, tän no dunof sinodi. Ab utans, kels dunons osi, osufons dadränäli koapik, ed atosi vilob spälön oles.

29. Atosi nu sagob oles, o svists: das tim binon brefik; e fovo, das utans, kels laboms jimatani, sötoms dunön, äsva no laboms ofi;

30. das utans, kels drenons, äsva no drenons; kels fredons, äsva no fredons; kels remons, äsva no odakipons bosi;

31. e kels bitons in vol, äsva no jäfons me on; ibä maged vola at opasetikon.

32. Nu vilob, das obinols nenkudiks. Utan, kel no matom, kudom dö dins Söli teföls; dö säkäd, vio oplitom Söli;

33. ab utan, kel matom, kudom dö dins volädik; dö säkäd, vio oplitom jimatani okik.

34. So kuds dabinons. So leigo vom e jiyunan, kels no matofs, kudofs dö dins Söli teföls, dat binofsös saludiks koapo e lanöfo! e jiutan, kel matof, kudof dö dins volädik; dö säkäd, vio oplitof himatani.

35. Atosi sagob oles ad ben olsik, no ad träpön olis, ab dat ols pötöfiko, fiediko e nentupiko slopolsös Söli!

36. Ab if ek cedom, das dunom nepötöfiko kol jigam okik, bi geniäl omik vedon tu nämöfik, e dun muton jenön, dalom dunön utosi, kelosi vilom, no dunom sinodi. Leadolsöd matikön onis!

37. If ye fümon in ladäl okik, e zesüd no dabinon, e kanom dunön utosi, kelosi vilom, e fümälom ad kipedön virgi jigama okik, tän dunom gudiko.

38. Klu utan, kel matikom ko jigam okik, dunom gudiko, ab utan, kel no matikom, dunom gudikumo.

39. Vom binof bligöfik dü tim, das himatan ofik lifom; if himatan ofik edeadom, tän binof lelivik ad matikön ko utan, ko kel vilof matikön, ab teiko nämätü Söl.

40. Ab cedü ob binof läbikum, if blebof jiviudan, e cedob, das i ob labob lanöfi Goda.

1. Tefü mit nimas lugodes pesakrifölas: sevobs, das obs valik labobs sevi veratik, (ab sev pleidükon, e löf devodükon;

2. if ek cedon, das labon sevi, tän no nog sevon, lio söton sevön bosi;

3. ab if ek löfon Godi, atan pasevon fa om).

4. Tefü fid mita nimas lugodes pesakrifölas nu: sevobs, das in vol lugods no dabinons, e das God nonik dabinom plä God bal.

5. Ibä ifi in sül e su taled gods sonemik dabinons, äsä jenöfiko gods e söls mödiks dabinons;

6. pro obs ye God te bal: Fat dabinom, se kel val ekömon, ed obs pro om; e Söl te bal: Yesus Kristus, dub kel dins valik ed obs dabinobs.

7. Ab no mens valik labons sevi; mens nog dabinons, kels labons sevälöfi lugodas, e fidons sakrifotamiti, kelas sevälöf fibälik kludo pemioton.

8. Zib no nilükon obis lü God; if fidobs, no obinobs pluiks, ed if no fidobs, no obinobs läsiks.

9. Demolsöd kludo, das leliv olsik no binonös joikaston lü ons, kels binons fibäliks.

10. Ibä if ek logon oli, kel binol men täläktik, lenseatöli in lugodatem, tän sevälöf fibälik onik, no olabon-li drani ad fidön sakrifotamiti?

11. So svist fibälik, demü kel Kristus edeadom, päridikon dub sev olik.

12. Ad sinön so ta svists, e viodön konsieni fibälik onsik, sinols ta Kristus.

13. Klu if zib seimik skänon svisti obik, tän laidüpio no plu ofidob miti, dat no skänobös svisti obik!

1. No binob-li paostolan? No binob-li livätik? No elogob-li Yesusi: Kristus, Söl obsik? No binols-li as slopans Söla vobod obik?

2. Ven no binob paostolan lo votans, ga binob paostolan pro ols; ibä ols as slopans Söla binols snil paostola obik.

3. Gidükam obik lü utans, kels dasäkons obi, binon atos.

4. No labobs-li gitäti ad fidön e drinön?

5. No labobs-li gitäti ad kesumön jisvisti, jimatani leigoäsä paostolans votik, e hisvists Söla, e <Cephas>?

6. U te ob e <Barnabas> no labobs-li gitäti ad nedunön febodi?

7. Kim dünädom-li föro tä mesedam fa ok it? Kim planom-li vitidagadi, e no juitom prodi ona? U kim galedom-li jepi e no juitom miligi ona?

8. Sagob-li atosi ma dasev menik, u lonem no i sagon-li atosi?

9. In lonem di <Moyses> ga pepenos: <No sötol musulön hobubi cepöl>! God kälälom-li hobubis?

10. U sagom-li osi teiko demü obs? Ibä demü obs pepenos, das plaudan mutom plaudön, e cepan mutom cepön, in spel, das ogetom dilodi atosa.

11. If esovobs oles dinis lanöfik, binos-li üfo veütik, das klopobs de ols dinis stöfik?

12. If votans kompenons pö utos, ad kel gitätols, tän no labobs-li gitäti mödikum ad atos? Ga no egebobs gitäti et, ab sufälobs vali, dat no kodobsös neletiani alseimik gospule Kristusa-

13. No sevols-li, das temadünans pakosididoms se legivots teme, e das utans, kels käloms latari, getoms dili sakrifota?

14. Leigo Söl ebüdülom, das predans gospula okosidons se predam ata.

15. Ab egebob nosi dinas at. E no penob atosi, dat pagebädosös kol ob; ibä buükoböv ad deadön, kas ek vanükonöv utosi, dö kelos pleidülob.

16. Ibä, das predob gospuli, atos no binon bos, dö kel kanob pleidülön; labob bligi ad dunön atosi. Vi! lü ob, if no predoböv.

17. Benö! if dunoböv libaviliko atosi, tän laboböv flagodi ad mesed; if no libaviliko, tän binob äs ek, kele guv pelükonfidon.

18. Ab kis nu mesed obik binon-li? Atos, das dunob predami glato, das no gebob gitäti ad pamesedön demü predam gospula.

19. So livätiko lo valans, evedükons obi dünani valanas, ad gaenön numi gretik onas.

20. Pro yudans evedob as yudan ad gaenön yudanis, do ob it no binob sumätöfü lonem, ad gaenön utanis, kels binons sumätöfü lonem evedob, as ek, kel binob sumätöfü lonem;

22. pro utans, kels no labons lonemi, evedob as ek, kel no labob lonemi, do binob lo God sumätöfü lonem, bi labob bligi sekü lonem Kristusa ad gaenön utanis, kels no labons lonemi.

22. Pro fibälans evedob as fibälan ad gaenön fibälanis; pro valans evedob as balan valanas ad savön ananis onas.

23. Dunob vali demü gospul, dat i ob it vedobös kekompenan ona!

24. No sevols-li, das valans, kels kompenoms in stadion pö mätarön, rönoms; ab das te bal dagetom premi? Rönolsöd so, dat dagetolsös oni!

25. Ed alan mätanas stönom dinis valasotik: Atans dunoms atosi ad dagetön kronüli nelaidik; obs ad dagetön laidiki.

26. Ob nu no golob, äsä utan, kel golom nefümiko; no komipob, äsä utan, kel flapom ini lut,

27. ab lebatob koapi obik, e damütob oni, dat no ob it, du predob votanes, sukubobös!

1. No vilob, o svists! das binols neseviks, das büröletans valik obsik äbinons dis lefog e das valans ätevons da mel,

2. e valans peblunedons in lefog ed in mel pro <Moyses>.

3. Ons valik efidons zibi lanöfik ot,

4. e valans edrinons drinedi lanöfik ot (ibä ädrinons se klif lanöfik, kel äketevon ko ons, e klif et äbinon Kristus).

5. Ab God no eplidom mödikünanis onas, ibä pedeifälons in däsärt.

6. Atos nu ejenon as sams pro obs, dat no ödesirobs dinis badik, äsä ons edunons.

7. I no vedolsöd lugodidünans, äsä anans onas! soäsä pepenos in bibapenäds: <Pöp äseidon oki ad fidön e drinön, ed älöädon ad pledön>.

8. I no dunobsöd nepuedi! äsä anans onas enepuedons, ed ün del bal mens teldegkilmil efalons.

9. I no blufodobsöd Kristusi! äsä anans onas eblufodons omi, e päpäridükons dub sneks.

10. I no murolsöd! äsä anans onas emurons, e pädeidons fa silanan rübükama.

11. Atos valik edrefon onis as sams, e pepenon as nuned pro obs, kels lifobs ün finod tima.

12. Klu utan, kel cedon, das stanon, kälonöd, das no falon!

13. No blufod votik, äsä ut, kel pötöfon pro men, edrefon olis; e God binom fiedik; no odälom, das pasufodols löpü fägs olsik, ab ogevom oles leigüpü sufod i säditretavegi, sodas ofägols ad sufidön ta on.

14. Sekü atos, o löfäbs obik! fugolsöd de lugodidün!

15. Spikob lü ols, asä lü mens täläktik; cödolsöd ols it utosi, kelosi sagob!

16. Köp, keli benedobs pö danisag, no magon-li kobädi ko blud Kristusa? Bod, keli breikobs, no magon-li kobädi ko koap Kristusa?

17. Ibä binobs boded bal, koap bal, vio mödiks binobs; obs valik kompenobs ga pö bod ot.

18. Logolsöd lü Yisraelänans stöfiko lüäliks! Utans, kels fidons de sakrifots, no kompenons-li pö latar?

19. Sagob-li nu, das lugod, ud ut, kel pasakrifon lugode, binon bos?

20. Nö! ab das utis, kelis sakrifons, sakrifons diabes, e no Gode, e no vilob, das olabols kobädi anik ko diabs.

21. No kanols drinön se köp Söla, e se köp diabas; no kanols kompenön len tab Söla, e len tab diabas.

22. U vilobs-li jaludükön Söli? Binobs-li bo nämikums ka om?

23. Val binon dälik, ab no val binon frutik; val binon dälik, ab no val devodükon.

24. Nek sukonöd demädi lönik okik, ab uti votana!

25. Fidolsöd vali, kel paselon su mitamaket, nendas konsien vestigon, va atos dalon!

26. <Ibä tal e ful onik dutons lü Söl>.

27. If nenlekredan vüdon olis, e labols klieni ad golön, fidolsöd vali, kel paböton oles, nendas vestigols, va konsien dälon atosi!

28. Ab if ek sagon oles: At binon mit sakrifota; tän no fidolsöd de on, demü utan, kel enunädon atosi oles, e demü konsien!

29. Sagob: demü konsien, ab no diseinob konsieni olsik, ab uti votana. Ibä sekü kis livät obik mutonöv-li pacödön dub konsien votana?

30. If kompenob danöfo pö bos; sekü kis palukofob-li täno demü ut, demü kel danisagob?

31. Klu, va fidols, va drinols, va dunols bosi votik, dunolsöd vali stimü God!

32. No skänolsöd yudanis, ni Helänanis, ni komoti Goda!

33. leigoäsä i ob steifob ad plitön valanis, no demü demäd lönik obik, ab demü ut valanas, dat padakiponsös!

1. Binolsöd züpans oba, soäsä i ob binob züpan Kristusa!

2. Lobülob olis, o svists! das pö dins valik betikols obi, e das kipedols lovegivotis, soäsä elovegivob onis oles.

3. Nu vilob, das sevols, das Kristus binom Söl mana alik, man binom söl voma, God binom Söl Kristusa.

4. Man alik, kel pö plekam u pö profetam labom bosi su kap jemükom kapi okik.

5. Ab vom alik, kel plekof u profetof ko kap no petegöl, jemükof kapi okik; ibä leigos, äsva herem ofik pideköton.

6. If ga vom no tegof oki, leadoföd täno dekötön heris okik! If nu vom binof nejönik, if herem ofik pedeköton u pedejeifon, leadoföd täno tegön kapi okik!

7. Ibä man no labom bligi ad tegön kapi okik, bi binom mag e glor Goda; du vom binof glor mana.

8. Ibä man no edavedom se vom, ab vom edavedof se man.

9. Ibä man i no pejafom demü vom, ab vom pejafof demü man.

10. Sekü atos vom mutof labön nämäta medömi su kap demü silanans.

11. Soeliko in komot ko Söl ni vom nen man binof bos, ni man nen vom;

12. ibä ebo asä vom edavedof se man, i man edavedom se vom, ab val edavedon se God.

13. Ols it cödolsöd! Binos-li gidöfik, das vom plekof lü God ko kap no petegöl?

14. Nat no tidon-li oles, das, if man labom heremi lunik, atos binon nenstimik lü om?

15. Ab, if vom labof heremi lunik, atos binon stim lü of, bi herem lunik pegivon ofe as mäned.

16. If ek nu vilon feitön tefü atos: obs no labobs kösömoti somik, ni komots Goda.

17. Du nu givob oles nomis, no lobülob, das no kobikols ad vedön gudikums, ab ad vedön badikums.

18. Ibä, balido lelilob, das if kobikols in komot, das feits dabinons bevü ols, e dilo kredob osi sio.

19. Ga lüäls difik bevü ols i zesüdons, dat sevädikosös, kins bevü ols binons plobiks!

20. If nu kobikols in komot, atos no binon säned Sölik,

21. ibä alan sumon dü fid uti, keli on it ekeblinon, e balan blebon faemik, e votan brietikon.

22. No labols-li üfo lödis ad fidön e drinön in ons? U nestümols-li komotis Goda, e jemükols-li utanis, kels no dalabons? Kisi osagob-li oles? Olobob-li olis? Demü atos no lobob olis.

23. Ibä ob it elelilob de Söl, kelosi i elovegivob oles, das Söl: Yesus, ün neit, kü päträtom, äsumom bodi,

24. e posä idanisagom, äbreikom oni, ed äsagom: [«Sumolsöd, fidolsöd!] at binon koap obik, kel pabreikon pro ols. Dunolsöd otosi mebü ob»!

25. Leigo i äsumom köpi pos fided, ed äsagom: «Köp at binon diatek nulik dub blud obik. Dunolsöd ai otosi, ven drinols se on mebü ob».

26. Ibä alna, das fidols bodi at, e drinols se köp, notükols deadami Söla, jüs kömom.

27. Klu utan, kel fidon bodi, u kel drinon se köp Söla ön mod nedinitik, viodon koapi e bludi Söla.

28. Vestigoyöd oki it, e fidoyöd so bodi, e drinoyöd so se köp!

29. Ibä utan, kel fidon e drinon träitölo nensiko koapi Söla, kodädon oke micödeti me fid e drin oka.

30. Sekü atos fibikans e malädikans so mödiks dabinons, ed ömans edeadons.

31. If obs it idunobsöv dasevo, no pimicödetobsöv.

32. Bi nu pamicödobs fa Söl, dagetobs blami, dat no pamicödetobsös ko volanef!

33. Klu, o svists obik! if kobikols ad fidön, stebedolsöd odis!

34. If ek faemon, tän fidonöd lomo! dat, ven kobikols no kodädolsös oles micödeti! Dinis votik oleodükob, ven ukömob lä ols.

1. Tefü tälenüls, o svists! no vilob, das binols neseviks tefü ons.

2. Sevols, das, ven äbinols pagans, pämofols äsvo lü lugods müätik.

3. Sekü atos sevädükob oles, das nek, kel spikon nämätü Lanal Goda, kanon nemön Yesusi blasfämi, e das nek kanon sagön, das Yesus binom Söl, äsä dub Saludalanal.

4. Nu tälenüls distik dabinons, do Lanal binon ot;

5. i düns distik dabinons, do Söl binom ot;

6. i duns distik dabinons, do binos God ot, kel koedom dabinön vali in valans.

7. Alane dasevädükam Lanala pagivom ad frut valemik.

8. Ibä balane dub Lanal vöd sapa pagivon, votane vöd nola dub Lanal ot,

9. e votane lekred dub Lanal et, dönu votane tälenül sana dub Lanal bal et;

10. votane ad duinön milagis, votane ad profetön, votane ad distidön lanis, votane ad vögön in püks distik, votane ad plänön pükis.

11. Atosi valik Lanal baläd ot dunon, du seagivon alane ma plid okik tälenüli patik onik.

12. Leigoäsä koap ga binon lölot bal, e labon limedis mödik, e limeds valik, vio gretik num onas binon, fomons koapi bal, so i Kristus binom.

13. Ibä ad koap bal obs valik peblunedobs dub Lanal: yudans e Helänans, slafans e lelivans. Obs valik peprägenobs me Lanal bal.

14. Ibä koap i no binädon me limed bal, ab me limeds mödik.

15. Ifi fut sagonöv: <bi no binob nam, no dutob lü koap>; duton too lü koap.

16. Ed ifi lil sagonöv: <bi no binob log, no dutob lü koap>; duton too lü koap.

17. If koap lölik binonöv log, kiöpo täno liläm binonöv-li? If lölot binonöv liläm, kiöpo täno smeiläm binonöv-li?

18. Nu God epladom limedis, ali onas patiko ini koap, soäsä ävilom.

19. If ons valik binonsöv limed bal, kiöpo täno koap binonöv-li?

20. Ab nu limeds mödik sio dabinons, e koap te bal.

21. Log no kanon sagön names: <No neodob olis>; ni kap futes:

<No neodob olis>.

22. Güo limeds jiniko fibiküns koapa binons zesüdiks;

23. ed utis, kelis lecedobs limedis läs stimabikis, stimobs plüo bundaniko; ed utis, kelis lecedobs läs gidöfikis, träitobs plüo gidöfiko;

24. limeds gidöfik obas no neodons atosi. God ekobopladom ye koapi so, das ägivom limede läsöfik stimi plüo gretiki;

25. dat teläl no ödavedon in koap, e dat limeds ökälons balälo odis.

26. If ga limed bal sufon, limeds valik kesufons; ed if limed bal geton stimi, tän limeds valik kefredons.

27. Ols nu binols koap Kristusa, ed alans olas patiko limeds oma.

28. Bu votans God epladom in komot atanis asä paostolanis, telido etanis asä profetanis, kilido votanis asä tidalis, fovo utanis, kels duinons milagis, kels labons tälenüli sana, kels kanons yufön, kels kanons guvön, kels vögons in püks distik.

29. Valans fägons-li ad binön paostolans? u profetans-li? tidals-li? milagiduinans-li?

30. u valans labons-li tälenüli sana? u tälenüli ad spikön-li pükis distik? ud ad plänön-li onis?

31. Steifolsöd ad dagetön tälenülis löpikün! Ed ojonob oles vegi nog sublimikumi.

1. If spikoböv pükis menas e silananas, e no laboböv löfi, so evedoböv trompet tonädöl u sämbal noidülöl.

2. If laboböv tälenüli profetama, ed if noloböv müsteris valik e nolavi valik, ed if laboböv lekredi valik, sodas kanoböv feapladön belis, e no laboböv löfi, so binoböv nos.

3. Ed if seagivoböv dalabotis valik obik ad kosididön pöfanis, ed if lovegivoböv koapi obik, dat pofilükoböv, e no laboböv löfi, so atos no frutonöv obi.

4. Löf binon lunasufälik, binon benädik; löf no jaludon; löf no pleidülon; no binon lurogik;

5. no dunon negidöfiko, no diseinon gaenäti okik, no biedälikon, no cedon bosi badiki;

6. no fredon in negid, ab fredon in verat;

7. säkusadilon vali; kredon vali; spelon vali; sufälon vali.

8. Löf pasetikon neföro; profetams, ats no ojenöfikons; püks, ats ofinikons; nol, at onosikon.

9. Ibä nol obsik binon nelölöfik, e profetam obsik binon nelölöfik;

10. ab ven lölöf ukömon, tän nelölöf ponosükon.

11. Ven äbinob cil, äspikob äsä cil; ämeugob äsä cil, ätikob äsä cil; ab nü evedob man, emoükob utosi, kelos äbinon cilik.

12. Ibä logobs nu da lok, äsä in fogs; ab täno ologob de logod lü logod; nu sevob nelölöfiko, ab täno osevob, äsä i ob pasevob.

13. E nu kil at: lekred, spel e löf blibons; ab gretikün atas, löf binon.

1. Besteifolsöd löfi, e steifolsöd ad dagetön tälenülis lanöfik, pato ad profetön!

2. Ibä utan, kel spikon püki nesevädik, no spikon menes, ab Gode; ibä nek suemon oni, ab lanöfo spikon vödis müsterik;

3. ab utan, kel profeton, sagon menes vödis devodükama, troda e stigädama.

4. Utan, kel spikon püki nesevädik, devodükon oki it; utan, kel profeton, devodükon komotanefi.

5. Viloböv, das ols valik spikons pükis nesevädik, ab buikumo, das profetols; ibä utan, kel profeton, binon völadikum, ka utan, kel spikon püki nesevädik, pläsif plänon oni, dat komotanef padevodükonös!

6. Benö! o svists! if kömoböv lü ols, e spikoböv püki nesevädik, fruti kinik blinoböv-li oles, if no sagoböv oles plao vödi dasevädükama, u vödi nola, u profetami, u lejoni?

7. Leigo atos tefon yegis nenlifik, kels tonons: flut u zitar; if no tononsöv me vögäds distik, lio sevoyöv-li, va flutoy u va ziteroy?

8. Ed if trompet tononöv me ton nekleilik, kim täno oblümükomöv-li krigio?

9. Leigo if me pük no spikolsöv spikädi suemovik, lio suemoyöv-li utosi, kelos pasagon? Ibä binolsöv, äsä mens, kels spikons in vien.

10. So bo sots mödik pükas dabinons in vol, e non onas no labon vögädi lönik okik.

11. If nu no nolob sinifi püka et, binoböv lo utan, kel spikon, barbaran, e spikölan lo ob barbaran.

12. Klu i ols, if steifols ad dagetön tälenülis lanöfik, steifolsöd täno ad beno distükön olis pö devodükam komota!

13. Demü atos utan, kel spikon püki nesevädik, plekonöd, das fägonös ad plänön oni!

14. Ibä if plekob in pük nesevädik, tän lan obik sio plekon, ab täläkt obik no kompenon pö atos.

15. Lio nu din stadon-li? Vilob plekön me lan obik, ab vilob i plekön me täläkt obik; vilob psamikanitön me lan obik, ab vilob i psamikanitön me täläkt obik.

16. Ibä, ven sagol me lan olik benedi, lio täno utan, kel pladülon topi komunana, osagon-li eli <so binosös>! pos danisag? bi no sevon utosi, kelosi sagol.

17. Sio sagol verätiko benedi, ab votan no padevodükon.

18. Danob Godi, das spikob pükis mödikum ka ols,

19. ab in komot vilob spikön buikumo vödis lul me täläkt obik, ka milis in pük nesevädik.

20. O svists! no vedolsöd täläkto cils! ab binolsöd lo bad as cils, e vedolsöd täläkto daülans!

21. In lonem pepenos: <Dub mens, kels spikons pükis votik, e dub lips votik ospikob lü pöp at, ed igo so no odalilons obi, Söl sagom>.

22. E so püks binons mal no pro utans, kels lekredons, ab pro utans, kels no lekredons; profetam ye no binon pro nenlekredans, ab pro lekredans.

23. If nu komotanef lölik kobikon, e valans spikons pükis nesevädik, tän utans, kels binons komuniks u nenlekrediks e nükömons, no osagons-li, das spikols äsä lienetans?

24. If ye valans profetonsöv, tän nenlekredan u komunan, kel nükömon, pasüadükon fa valans, e pacödon fa valans;

25. utos, kelos peklänedon in ladäl onik, onotikon, e so ofalon sui logod okik, ed okulton Godi, bi dasevon, das God binom jenöfiko in zänod olas.

26. Lio nu din binon-li? o svists! If kobikols, tän alan olas labol psami, lejoni, püki, paokalüpi, pläni; val binonöd ad devodükön!

27. If spikoy in pük nesevädik, tän atos jenonöd fa pösods tel u mödiküno kils, turniko, e bal plänonöd osi!

28. If plänan no dabinon, tän seilonöd in komot, e spikonöd pro ok it e pro God!

29. Profetans tel u kils spikonsöd, e retans cödonsöd verati vödas onsik!

30. If bos padasevädükon eke, kel komon, tän balidan seilonöd!

31. Ibä ols valik, bal pos votik, kanols profetön, dat valans lärnonsös e patrodonsös!

32. E lans profetanas binons sumätöfü profetans,

33. ibä God no binom God brula, ab püda, äsä in komots valik saludanas.

34. In komots voms olsik mutofs seilön, ibä spikam no pedälon ofes; mutofs sumätöfön, soäsä i lonem büdülon.

35. If vilofs lärnön bosi, tän mutofs begön osi lomo himatanes lönik oksik. Ibä binos nepötöfik lü voms ad spikön in kobikams komota.

36. U vöd Goda ekömon-li de ols, ud ekömon-li lü ols?

37. If ek lecedon oki profetani u menilanöfik, tän dasevonöd, das utos, kelosi penob oles, binon büd Söla!

38. If nu ek no sevon osi, tän bleibonöd no sevön osi!

39. Klu, o svists! besteifolsöd profetami, e no neletolsöd ad spikön in püks nesevädik!

40. Val jenonöd pötöfiko e leodiko!

1. Nu notükob oles, o svists! gospuli, keli epredob oles, keli i elüsumols, ed in kel laidälols,

2. dub kel i padakipols, if ekipedols vio epredob oni oles, pläsif elekredols vaniko.

3. Ibä bu val elovegivob oles utosi, kelosi elelilob, sevabo das baiädü penäds bibik Kristus edeadom pro sinods obsik,

4. das pesepülom, e baiädü penäds elelifikom tü del kilid,

5. das epubom lo <Cephas>, e fovo lo degtelanef.

6. Pos atos epubom leigüpiko lo svists plu lultum, kelas mödikünans nog lifons, ed anans edeadons.

7. Pos atos epubom lo <Iacobus>, fovo lo paostolans valik,

8. e fino, äsva lo tusuniko-pemotölan, i lo ob.

9. Ibä binob pülikün paostolanas, kel no digädob ad panemön paostolan, bi epöjutob komoti Goda.

10. Ab dub benäd Goda binob utan, kel evedob, e benäd obe pelegivöl no ebinon vanik, alo etöbidob mödikumo, ka oms valik, sevabo no ob, ab benäd Goda, kel äbinon ko ob.

11. U va ob, u va votans, obs epredobs so, ed ols elüsumols osi lekrediko.

12. If nu papredos, das Kristus pelelifükom se deadam, lio semans olas kanons-li sagön, das lelifikam se deadam no dabinon?

13. If lelifikam se deadam no dabinon, tän Kristus i no pelelifükom,

14. ed if Kristus no pelelifükom, tän ga pred obsik no labon siämi, ed i lekred olsik binon täno vanik.

15. Tän i klülädos, das äbinobs temunans dobik ta God, bi etemunobs dö God, das elelifükom Kristusi, keli no elelifükom, üf deadans no palelifükons.

16. Ibä if deadans no palelifükons, tän i Kristus no pelelifükom,

17. ed if Kristus no pelelifükom, tän lekred olsik binon vanik, tän nog stadols in sinods;

18. tän i utans epäridikons, kels edeadons in lekred Kristusa.

19. If spelobs te pro lif at in Kristus, tän binobs miserabiküns menas valik.

20. Nu ye Kristus pelelifükom se deadans; evedom balid deadanas at.

21. Leigoäsä dead edavedon dub men, i lelifikam se deadam edavedon dub men.

22. Ibä leigoäsä valans, as posbinans de <Adam> deadons, i valans lü Kristus dutöls olelifikons.

23. Alan ma kedot okik. Bu val Kristus, täno utans, kels dutons lü Kristus timü köm omik;

24. pos atos fin obinon, ven ulovegivom regäni Goda ä Fate, posä unosükom reigi, nämädi e nämi alikis.

25. Ibä mutom regön <jüs udoseitom neflenis valik disi futs okik>.

26. Neflen lätik, kel panosükon, dead binon.

27. <Ibä edoseitom vali disi futs okik>. Ven sagom, das val binon sumätöfü om, tän kleilos, das om, kel esumätöfükom ome vali, pepläom se atos valik.

28. E ven val usumätöfon lü om, tän i Son it osumätöfikom lü om, kel esumätöfükom vali lü om, dat God binomös val in dins valik.

29. Kisi üfo utans ojafädons-li, kels ekoedons blunedön okis demü edeadölans? If deadans leno palelifükons, sekü kis pablunedons-li üfo demü deadans?

30. Pro kis riskädikobs-li üfo tü düp alik?

31. Deadob vo tü del alik, if dalob pleidülön dö kobäd ko ols in Kristus: Yesus, Söl obsik.

32. If ob, ma ced menik, ekomipob in <Ephesus> ta nims sovadik, fruti kinik atos givon-li obe? If deadans ga no palelifükons, <tän fidobsöd e drinobsöd, ibä odelo odeadobs>!

33. No pölolsöd! <spikots badik rübükons südis gudik>.

34. Gebädolsöd pötiko tikäli saunik olsik, e no sinolsöd! Semans ga nelabons sevi Goda; sagob osi ad jemükön olis.

35. Ab osäkoy: Lio deadans polelifükons-li? Ko koap kinik osüikons-li?

36. O ol: fopan! i ut, keli sovol, no lifikon dönu, pläsif edeadon,

37. ed ut, keli sovol, no binon koap, kel odavedon, ab teiko gran grena seimik,

38. e God givom nu one koapi ma plid okik, efe side alik koapi lönik onik.

39. No mit alik binon ot, ab mit mena binon distik de mit nima, e mit fita binon distik de mit böda.

40. So i koaps sülik dabinons e koaps talik, ab glor koapas sülik diston de taliks.

41. Glor sola diston de ut muna, e de ut stelas. Igo glor stela bal diston de ut votika.

42. Soik i lelifikam deadanas binon. Bos, as koap nelaidik pasovon, ed as koap laidik palelifükon.

43. Bos, kel binon necädik pasovon, e bos, kel binon glorik lelifikon; bos, kel binon fibik pasovon, e bos, kel binon nämik lelifikon.

44. Koap sänsüelik pasovon; koap lanöfik palelifükon. Äsä koap sänsüelik dabinon, i koap lanöfik dabinon.

45. So i pepenos in bibapenäd: <Men balid: <Adam> ävedom lan äliföl> (ed <Adam> lätik lanöf lifüköl);

46. lanöf no davedon balido, ab ut, kel binon sienovik, pos atos lanöf kömon.

47. Men balid se tal binom talik; men telid: Söl binom se sül.

48. Äsä talikan binon, talikans binons, ed äsä sülikan binon, i sülikans binons.

49. Leigo äsä epolobs magi talik, opolobs i magi sülik.

50. Atosi sagob oles, o svists! das mid e blud no kanons gerön regäni Goda, e das nelaid no geron laidi.

51. Ekö! sagob oles müsteri, no obs valik odeadobs, ab obs valik poceinobs,

52. ün timül nedilovik, pö tonäd lätik posuna. Ibä posun otonon, e deadans olelifikons laidio, ed obs poceinobs.

53. Ibä nelaid muton klotön oki me laid, e deadöf muton klotön oki me nedeadöf.

54. Ven nu nelaid at ukloton oki me laid, e deadöf at ekloton oki me deadöf, tän vöd pepenöl ojenöfikon: <Dead peslugon pro vikod>.

55. <O dead! kiöpo stigäd olik binon-li? O höl! kiöpo vikod olik binon-li>?

56. Stigäd deada nu sinod binon, e näm sinoda lonem.

57. Dan binonös lü God, kel givom obes vikodi dub Söl obsik: Yesus Kristus!

58. Klu, o svists palöföl obik! Binolsöd laidäliks, nemufiks ed ai töbidiks pö vobod Söla, bi sevobs, das vob olsik in kobäd ko Söl no binon vanik.

1. Tefü käded nu pro saludans, mutols dunön, äsä ebüdülob pro komots Galatiyäna.

2. Tü del balid viga alan olas spälolöd e kipedolöd ma benastad olik bosi, dat käded no nog jenonös, ven kömob!

3. Ven ukömob lä ols, olesedob utanis, kelis konfidols ko peneds lü <Hierusalem> ad loveblinön usio givotis olsik.

4. If digädos töbi, das ob it golob, tän ogoloms kobü ob.

5. Okömob lä ols, ven udutävob Makedonäni, ibä otävob da Makedonän.

6. Ostebob bo lä ols, ud igo olifädob nifüpi. So kanols dugädön obi utöpio, kö otävob.

7. Ibä nu no vilob logön olis te beigolölo, ab spelob ad stebön dü tim anik lä ols, if Söl dälom osi.

8. Blibob in <Ephesus> jü pint.

9. Yan gretik e nämöfik vo maifon pro ob, e taans mödik dabinons.

10. Ven nu <Timotheus> kömom, kudolsöd täno, das senälom lomöfi lä ols, ibä dunom vobodi Söla, äsä ob;

11. tän nek ludigidonöd omi! Sedugädolsöd omi püdo, dat kömomös lü ob! ibä spetob omi ko svists.

12. Tefü <Apollo>: hisvist, estigädob omi vemo ad golön ko svists lü ols; ab no labom veriko klieni ad golön nu lü ols; okömom, ven plidom osi.

13. Galolsöd, laidälolsöd in lekred, binolsöd manöfiks e nämiks!

14. Utos valik, kelosi dunols, jenonöd in löf!

15. Sevols, o svists! domi ela <Stephanas>, kel äbinom balidan in Lagayän, e kel egebidükom oki düne saludanes. Nu lebegob oles,

16. das sumätöfükols olis lo mens somik, e lo utans valik, kels kevobons e ketöbidons ko ons.

17. Nu fredob dö kom ela <Stephanas>, ela <Fortunatus> ed ela <Achaicus>; ibä eläfulükoms utosi, in kelos äläsols.

18. Ibä eklietoms e lani obik e lanis olsik. Digidolsöd kludo menis somik!

19. Komots ela <Asia> glidons olis. <Aquila> e <Prisca> ko komotans, kels kobikons in dom onsik, sedons oles glidis mödik nämätü Söl.

20. Svists valik glidons olis. Glidolsöd odis ko kid saludik!

21. Glid patik de ob: <Paulus>.

22. Malediti utane, kel no löfon Söli: Yesus Kristus! <Marana tha>! [O Söl obas, kömolös!]

23. Benäd Söla: Yesus Kristus binonös ko ols!

24. Löf obik nämätü Kristus Yesus binon lä ols valik! So binosös!

---------- oOo ----------

1. <Paulus>: ma vil Goda paostolan Yesusa: Kristus, e hisvist: <Timotheus> komote Goda in <Corinthus>, ed i saludanes valik in Lagayän lölik.

2. Benäd e püd binonsöd lü ols dub God: Fat obas e Söla: Yesus Kristus!

3. Palelobomöd God ä Fat Söla obsik: Yesus Kristus, Fat miseröl ä God mu trodöl,

4. kel trodom obis pö dränäl valik obsik, sodas kanobs trodön utanis, kels sufons dränäli alseimik me trod, me kel obs it petrodobs fa God.

5. Ibä, leigoäsä suf Kristusa edrefon bundano obis, so i petrodobs bundano fa Kristus.

6. Va nu padränälobs, binos ad trod e beat olas, kelos davedon in sufäl sufa ot, keli mutobs sufön, e spel obsik in ols binon fümik; u va patrodobs, binos ad trod e beat olas,

7. bi sevobs, das leigoäsä kompenols pö suf, so i kompenols pö trod.

8. Ibä no vilobs vedükön olis nesevikis, o svists! dö dränäl obas in <Asia>; bi us pefledobs me töb mu vemik, kel ätuikon tefü näm obsik, sodas ädäsperobs, va ökanobs dakipön lifi.

9. Si! ispetob ya ninälo deadacödeti, dat no ökonfidobs obis it, ab Godi, kel lelifükom deadanis,

10. kel esavom obis se deadamariskäd so gretik, e nog ai savom, ed obs de om spelobs, das osavom fovo obis,

11. du i ols kevobols benü obs dub plek olsik, dat demü legivot benädik obes pegevöl, mödikans danonsös gönü obs!

12. Ibä pleidülobs ga, das konsien obsik temunon, das ekosädobs balugiko e ko stedäl lo God, no ko sap midik, in vol, e pato ko ols.

13. Ibä no penobs oles bosi, äsä utosi, kelosi sevols e suemols, e spelob, das osuemols osi lölöfiko;

14. leigoäsä ya esuemols obis diliko: das pleidülols demü obs, leigoäsä pleidülobs demü ols ün del Söla: Yesus.

15. E pö konfid at, ävilob büiko kömön lü ols, dat dagetolsös legivoti benädik telid,

16. e dutevön ve zif olsik lü Makedonän, e täno golön dönu lü ols, ad posedugädön fa ols lü Yudän.

17. Ebinob-li tän läcerik, ven ävilob dunön atosi? ud edesinob-li atosi, soäsä dunoy suvo osi; das ädesinob ninälo nu ad dunön, täno ad no dunön osi?

18. Äsä God binom fiedik, i vöd obsik lü ols no äbinon nu: si! e täno: nö!

19. Ibä pö Son Goda: Yesus Kristus, kel penotükom bevü ols fa ob, <Silvanus> e <Timotheus>, no äbinos sio e no, ab pö om äbinos ai sio.

20. Ibä proms valik Goda binons in om siiks, e sekü atos sagobs: So binosös! stimü God.

21. Utan, kel nu yümätom obis ko ols in Yesus, e leüledom obis, binom God,

22. ed estäpedom sui obs snili okik, ed egivom ladäles obsik as penot Lanali okik.

23. Nu lüvokob Godi asä temunani lo lan obik, das ad spalön oles,

no nog egolob lü <Corinthus>;

24. efe no ad bemastön lekredi olsik; binobs güo kekompenans pö fred olsik; ibä laidälols in lekred.

1. Nu isludob ad no kömön dönu glumo lü ols.

2. Ibä if glumükob olis, kin dabinon-li üfo, kel kanon fredükön obi, äsä utan, kel peglumükon fa ob?

3. Ed atosi epenob ebo oles, ad no tuvön pö köm obik glumi de utans, kels mutons fredükön obi, bi labob konfidi in ols valik, das fred obik i binon fred olas valik.

4. Ibä epenob oles ko drens mödik, se dränäls e töböfs valasotiks ladäla, no dat glumikolsös, ab dat sevolsös löfi gretik, keli senälob pro ols!

5. If ek nu ekodon glumi, tän no eglumükon te obi, ab i dilo (ad no tuükön) olis valik.

6. Pro soman blam de pluamanum saidonös!

7. sodas nu güo pardolsös e trodolsös buikumo oni, dat no päridikonös sekü glum tu gretik!

8. Sekü atos konsälob oles ad gevön one löfi olsik.

9. Ibä diseinü atos epenob oles, dat sevobös natäli olsik, va binols lobediks in dins valik!

10. Kine pardols bosi, ome i ob pardob osi; ibä if epardob bosi, tän edunob atosi demü ols, äsva stadob lo Kristus;

11. dat no pabemastobsös fa diab! ibä no nesevobs zeilis omik.

12. Ven äkömob ini <Troas> ad notükön gospuli Kristusa, e do yan pimaifükon obe fa Söl, ninälo no älabob takedi, bi no ätuvob us blodi obik: <Titus>,

13. e, posä ileditob de elans di <Troas>, ädetävob lü Makedonän.

14. Dani lü God, kel koedom levikodön obis nämätü Kristus, e sevädükom valöpo dub obs benosmeli lejona omik!

15. Ibä binobs benosmelasakrifot Kristusa lü God pro utans, kels padakipons, e pro utans, kels päridikons;

16. pro atans benosmel deada pro deadam, e pro etans benosmel lifa pro lifans. E kin fägon-li ad atos?

17. Obs, ibä no selobs, äsä mödikans dunons, vödi Goda, ab spikobs stedäliko, äsvo se God, lo God, in Kristus.

1. Primobs-li dönu ad komandön obis it? U neodobs-li bo, äsä mens semik, komandapenädis pro ols u de ols?

2. Penäd obsik ols binols; penäd, kel pepenon ini ladäls obsik, kel sevädon pö mens valik e pereidon fa valans.

3. Vö! kleilos, das binols penäd Kristusa, kel pelauton in dün obsik, kel no pepenon me nig, ab me Lanal Goda lifik; no sui stons, ab sui stons midik ladäla.

4. Konfidi at nu labobs dub Kristus pö God.

5. No binos, das fägobs se obs it ad datikön bosi, äsva atos süikon se obs it, ab fäg obsik kömon se God,

6. kel efägükom obis ad binön dünans diateka nulik, no diateka tonatas, ab lana; ibä tonat deidon, lan lifükon.

7. Ven nu dün bosa deadöfik me tonats sui stons peglivöla evedon bos glorik, sodas cils Yisraeläna no äkanons sufidön logami logoda ela <Moyses>, demü nid logoda omik, kel omoikon;

8. dün lana no obinon-li täno nog glorikum?

9. Ven ga dün bosa, kel pemicödon, binon glorik, vio plüo bundaniko dün bosa gidik opluon leigodü on in glor!

10. E glor et igo omoikon demü glor mu gretikum at.

11. Ven nu nelaidikos binon glorik, vio plüo mödikumo laidikos binon glorik!

12. Bi nu labobs speli somik, spikobs vemo nenplafiko,

13. e no dunobs, äsä <Moyses>, kel äpladom veali sui logod okik, dat cils Yisraeläna no ölogons, ad kis nelaidikos öfinikon.

14. Ab tikäl onsik edölikon. Ibä jü atim pö reid diateka vönik veal ebleibon seatön, no pemoükon, ibä pas palivükon fa Kristus.

15. Ab jü atim, ven el <Moyses> paloreidon, veal seaton su ladäls onsik:

16. Ven äflekom oki lü Söl, veal pämotovon.

17. Söl nu binom Lanal, ed utöpo, kö Lanal Söla binon, lib dabinon.

18. Obs valik nu, kels labü logod pesävealöl logobs äsä in lok glori Söla, cenobs mago de glor bal ad glor votik dub näm Lanala Söla.

1. Demü atos, nü pemiserobs e labobs düni at, no säkuradikobs,

2. ab eklemobs dinis jemodik, ad duinön käfodis ud ad dobükön vödi Goda, ab komandobs obis, dubä notükobs verati, yufidölo konsienis valik menas lo God.

3. Ed if gospul obsik binon klänedik, tän binon kl&a